Pas dështimit të konstituimit të Kuvendit të Kosovës, deputetët e LVV-së Albulena Haxhiu dhe Artan Abrashi thanë se përgjegjëse për dështim është opozita, duke tentuar sipas tyre ta vonojnë konstituimin e Kuvendit të Kosovës.
Deputetja e VV-së Albulena Haxhiu tha se kjo letër-dorëheqja e Albin Kurtit ishte në përputhje me Kushtetutën e legjislacionin në fuqi.
Sipas saj, opozita ka në hall kryeministrin në detyrë Albin Kurtin e Lëvizjen Vetëvendosje.
Haxhiu: Opozita e refuzoi votimin e këtij raporti, ndonëse gjithçka ishte në përputhje me Kushtetutën
"Grupi Parlamentar i VV-së ishte i gatshëm që të jetë i pranishëm me prezencë fizike në ketë seancë dhe të votojë, të bëjë betimin e deputetëve, dhe të vazhdojmë me procedura tjera. Por, ndodhi një situatë e paprecedent, opozita nuk e votoj raportin e Komisionit për verifikimin e kuorumit dhe mandateve. Një situatë që nuk ka ndodhur në të kaluarën, opozita e refuzoi votimin e këtij raporti, ndonëse gjithçka ishte në përputhje me Kushtetutën, legjislacionin në fuqi. Kjo opozitë asnjë fjalë nuk e tha asnjëherë kundrejt listën serbe, as në KQZ, as në kohën kur diskutohej për certifikimin por kanë hall kryetari e Lëvizjes, Albin Kurtin, Lëvizjen Vetëvendosje", tha Haxhiu.
Ndërsa deputeti tjetër, Artan Abrashi i cili e kryesoi këtë komision shtoi se mosvotimi i Komisionit ishin arsyetime të paqena duke penguar votimin.
Abrashi theksoi se Komisioni ka qenë i njoftuar lidhur me dorëheqjen e Kurtit dhe ministrave.
Abrashi: Përmes arsyetimeve të paqena është penguar votimi i raportit të KQZ-së
"Ishim dëshmitarë të një situate të paprecedent. Përmes arsyetimeve të paqena është penguar votimi i raportit të KQZ-së, kjo nuk ka ndodhur asnjëherë më herët, si do të veprojë tash e tutje mbetet të shihet.. Edhe sipas njoftimit të kryeministrit, është njoftuar komisioni lidhur me dorëheqjen", shtoi Abrashi.
Mos votimin e raportit të Komisionit për verifikimin e mandateve dhe kuorumit, kryetari i Lëvizjes Vetëvendosje, Albin Kurti e ka cilësuar “sulm brenda institucional kundër Republikës së Kosovës dhe zgjedhjeve demokratike”.
Ishin 52 deputetë për, 46 kundër dhe 11 deputetë që abstenuan të martën.
