Ministrja në detyrë e Ekonomisë, Artane Rizvanolli, ka njofutar se është mbyllur kompania paralele e ujësjellësit “Ibar” në Mitrovicën e Veriut.
Përmes një statusi në Facebook, ajo ka thënë se kjo ka ndodhur me kërkesë të Njësisë për Monitorimin e Ndërmarrjeve Publike të Ministrisë së Ekonomisë.
“Ky është një hap konkret që i shërben sundimit të ligjit dhe funksionalizimit të shërbimeve publike nga institucionet e shtetit tonë. Në përputhje me marrëveshjen e nënshkruar në janar të këtij viti mes KRU Mitrovicës dhe Komunës së Mitrovicës së Veriut, shërbimet e rregullta e më cilësore për qytetarët e Komunës së Mitrovicës së Veriut do të ofrohen nga KRU Mitrovica, me standarde më të larta dhe në përputhje të plotë me ligjet tona”, ka shkruar Rizvanolli.
Këtë veprim e ka mbështetur edhe kryeministri në detyrë Albin Kurti.
“Përgëzime dhe punë të mbarë KRU Mitrovicës në ofrimin e shërbimeve cilësore për të gjithë qytetarët e Komunës së Mitrovicës së veriut”, shkruan ai.