Vendosen gurthemelet e dy urave të reja mbi lumin Ibër në Mitrovicë/ Deklarohet Kurti, flet edhe për urën kryesore

Aktuale

Vendosen gurthemelet e dy urave të reja mbi lumin Ibër në Mitrovicë/ Deklarohet Kurti, flet edhe për urën kryesore

Më: 1 korrik 2025 Në ora: 17:20 Përditësuar në ora: 18:00 më 01.07.2025
Albin Kurti

Kurti: Gjithmonë jemi për hapje dhe për ura lidhëse, përfshirë edhe urën kryesore mbi lumin Ibër

Kryeministri në detyrë, Albin Kurti, theksoi se Qeveria e Kosovës mbetet e përkushtuar ndaj bashkëpunimit dhe transparencës, duke vepruar gjithmonë në përputhje me planet zhvillimore dhe në të mirë të qytetarëve.

Ai u shpreh se institucionet janë të hapura për komunikim me çdo palë që ka paqartësi, ndërsa ritheksoi se ndërtimi i urave të reja mbi lumin Ibër është simbol i lidhjes dhe afrimit mes komuniteteve.

“Unë gjithmonë jam për ura bashkëpunimi dhe marr pjesë në takime. Gjithçka që bëjmë është në përputhje me planet tona dhe në të mirë të qytetarëve. Ata që kanë dilema, mund të na kontaktojnë lirisht. Ju e dini qëndrimin tonë – jemi për hapje dhe për ura lidhëse, përfshirë edhe urën kryesore mbi lumin Ibër. Aktualisht atje ka vetëm njësi të policisë, dhe natyrisht, edhe ajo urë do të hapet.”

​Arrestohen gjashtë persona pak para se të shkonte Kurti në veri, nuk respektuan urdhëratë e Policisë

Gjashtë persona janë arrestuar në veri të Mitrovicës, pasi nuk kanë respektuar urdhërata e zyrtarëve policorë.

Zëvendësdrejtori i Policisë së Kosovës për veriun e Mitrovicës, Veron Elshani i ka thënë KosovaPress-it, se ata janë arrestuar për shkak se nuk kanë respektuar urdhëratë e zyrtarëve policorë.

KosovaPress merr vesh që pesë serbët e arrestuar dhe një shqiptar, nuk janë larguar në distancën që kërkonte policia, në momentin kur pritej që në atë pjesë të vinte kabineti qeveritarë në detyrë, dhe zyrtarë të Mitrovicës së Veriut e Jugut, për të vënë gurthemelin e dy urave që do të ndërtohen në afërsi të urës kryesore mbi lumin Ibër.

Ata janë futur nëpër veturat e policisë dhe pas deklaratave në stacionin policor, pritet të lirohen në procedurë të rregullt.

Më vonë aty ka arritur kryeministri në detyrë, Albin Kurti ka thënë se këto dy ura do ta bëjnë numrin e urave në 37 gjithsej në lumin Ibër. Ai tha se presin që në vjeshtë të përurojnë këto dy ora.

Ura për automjete dhe këmbësorë do të jetë 51 metra e gjatë dhe 5 metra e gjerë.

Ura tjetër do të jetë vetëm për këmbësor me gjatësi 41 metra dhe gjerësi 47 metra.

Vendosen gurthemelet e dy urave të reja mbi lumin Ibër në Mitrovicë

Kryeministri në detyrë i Republikës së Kosovës, Albin Kurti, së bashku me përfaqësues të dy komunave të Mitrovicës dhe ministra të kabinetit qeveritar, kanë vendosur të martën gurthemelin për ndërtimin e dy urave të reja mbi lumin Ibër, në kuadër të një projekti të përbashkët ndërmjet institucioneve qendrore dhe lokale.

Në ceremoninë e vendosjes së gurthemelit morën pjesë kryetari i Komunës së Mitrovicës së veriut, Erden Atiq, nënkryetari i Komunës së Mitrovicës së jugut, Arian Tahiri, ministri në detyrë i Administrimit të Pushtetit Lokal, njëherësh kryesues i Bordit të Përbashkët të dy komunave, Elbert Krasniqi, dhe ministri në detyrë i Mjedisit, Planifikimit Hapësinor dhe Infrastrukturës, Liburn Aliu.

Ndërtimi i këtyre urave po realizohet në kuadër të Memorandumit të Bashkëpunimit ndërmjet Ministrisë së Mjedisit, Planifikimit Hapësinor dhe Infrastrukturës dhe komunave të Mitrovicës së jugut dhe veriut.

Gurthemeli i urës për kalim të veturave është vendosur më afërsi të objektit të Komunës së Mitrovicës së veriut, ndërsa ura për kalimin e këmbësorëve është vendosur përballë kopshtit të fëmijëve “Gëzimi ynë”.

Aliu viziton vendin ku do të ndërtohen urat e reja mbi Ibër

Ministri në detyrë i Mjedisit, Planifikimit Hapësinor dhe Infrastrukturës, Liburn Aliu, ka zhvilluar një vizitë në Mitrovicë, ku ka inspektuar vendin ku do të vendosen gurthemelet e dy urave të reja mbi lumin Ibër.

Në kuadër të përgatitjeve për këtë projekt infrastrukturor, Aliu ka parë nga afër terrenin ku do të ndërtohen urat.

Ngjarja zyrtare e vendosjes së gurthemeleve do të mbahet të martën, më 1 korrik, ku në ora 17:00 do të vendoset gurthemeli i urës për kalimin e veturave, e më pas do të pasojë vendosja e gurthemelit për urën e këmbësorëve.

Në këtë ceremoni do të marrin pjesë kryeministri në detyrë i Republikës së Kosovës, Albin Kurti, kryetari i Komunës së Mitrovicës së veriut, Erden Atiq, nënkryetari i Komunës së Mitrovicës së jugut, Arian Tahiri, si dhe ministri në detyrë i Administrimit të Pushtetit Lokal, Elbert Krasniqi, në cilësinë e Kryesuesit të Bordit të Përbashkët të dy komunave.

comment Për komente lëvizni më poshtë
Sot mund të lexoni Shfletoni kopertinat