FSK-ja hyri në veri të Kosovës, Elshani sqaron si ndodhi rasti

Aktuale

FSK-ja hyri në veri të Kosovës, Elshani sqaron si ndodhi rasti

Më: 16 tetor 2025 Në ora: 12:45
Foto ilustrim

Disa automjete të Forcës së Sigurisë së Kosovës (FSK) kanë hyrë gabimisht në territorin e Mitrovicës së Veriut gjatë ditës së enjte.

Lajmin e ka konfirmuar zëvendësdrejtori i Policisë së Kosovës për rajonin e veriut, Veton Elshani.

Sipas tij, automjetet e FSK-së qëndruan për disa minuta në një stacion karburanti, ku janë vërejtur nga policia.

“Diku para orës 11.00 në afërsi të stacionit Policor në Mitrovica Veri te ish NIS Petrol, janë parkuar disa automjete të FSK-së. Kur atyre iu është afruar Policia, të njëjtit kanë thënë se e kanë ngatërruar rrugën. Policia i ka përcjell nga ai vend deri te Kërshi i Dudës”, ka deklaruar Elshani për Dukagjinin. 

Mediat serbe dhe pamjet e publikuara në rrjetin Telegram treguan kolonën e automjeteve të FSK-së duke hyrë në rrugën kryesore të Mitrovicës së Veriut në orët e mëngjesit.

Dëshmitarë okularë u thanë atyre se automjetet, mes tyre disa “Hummer” dhe disa kamionë ushtarakë, qëndruan aty për rreth dhjetë minuta.

Fillimisht, qytetarët menduan se bëhej fjalë për automjete të KFOR-it.

Elshani konfirmoi se situata ka qenë e qetë dhe nuk është shënuar asnjë incident.

comment Për komente lëvizni më poshtë
Sot mund të lexoni Shfletoni kopertinat