Sulmi terrorist në Ibër-Lepenc: Prova të reja ADN-je dhe dëme prej qindra mijëra eurosh

Aktuale

Sulmi terrorist në Ibër-Lepenc: Prova të reja ADN-je dhe dëme prej qindra mijëra eurosh

Më: 27 korrik 2026 Në ora: 07:39 Përditësuar në ora: 12:58 më 27.07.2026
Arkiv

Seanca për sulmin terrorist në Ibër Lepenc ndërpritet, eksperti paraqet prova të reja të ADN-së

Në një fitil kabllondezës, nga 24 lokuse të gjeneve të ADN-së, 20 prej tyre janë gjetur mostra të ADN-së që i përkasin të pandehurit Jovan Viqentijeviq, i cili akuzohet për sulm terrorist në kanalin e Ibër Lepencit.

Këto prova në Gjykatën Themelore në Prishtinë u paraqitën nga biologu në Agjencinë e Kosovës për Forenzikë, dëshmitari i dytë, i cili po dëshmon në Gjykatën Themelore në Prishtinë, Fatmir Ademi.

Ademi: Në fitil kemi vrejtur shenjat ishin shenjat e Jovan Viqentijeviq

“Sa i përket përputhjeve të personave nën shifrat S1, S2, që është Jovan Viqentijeviq, S3-S4 Dragisha, ne përputhjet me dëshmitë e caktuara i kemi dhënë në raportin e ADN-së. Çka është me rëndësi, në konkluzionin numër 5, ndër dëshmitë e tjera kanë qenë edhe tre dëshmi nga vendi i ngjarjes, ku janë fituar profile të përziera të ADN-së dhe ne këtu i kemi kontrolluar në mënyrë manuale. Në dëshminë numër 4, e cila është e përshkruar si një fitil kabllondezës me gjatësi 60 metra, gjatë kontrollimit ne kemi vërejtur shenjat e personit S1, Jovan. Prej 24 lokuseve të gjeneve që kemi analizuar, në 20 vende kemi gjetur shenjat e S1. Ne i përdorim metodat më të avancuara shkencore, të cilat janë të validuara dhe që ekzistojnë procedura të shkruara që secili ekspert t'i përdorë të njëjtat. Në procedurën krijuese për faktimin e sasisë, kemi përdorur instrumentin One Studio Test”, tha ai.

Një ekspertizë ka bërë edhe laboratori i Romës, i cili ka vërtetuar të gjeturat e njëjta.

Ademi: Raporti i italian dhe Agjencisë së Fornezikës së Kosovës nuk kishin kundërthënie

“Sa i përket raportit të kolegëve italianë nuk ka pasur kundërthënie, janë vërtetuar të gjeturat tona. Raporti i tyre veç e ka forcuar sinjalin tonë, që kemi parë shenja të personit në fjalë, ata me ndihmën e softuerit dhe metodave të tyre, në mënyrë shkencore, e kanë bërë ndërlidhjen e personit S1 me njërin prej kontribuesve në miksturën prej tre personave”, tha ai.

Në ekspertizë thuhet se gjurmët më të mëdha janë të të akuzuarit.

Ademi:Gjurmët më të mëdha kanë qenë nga Jovan Viqentijeviq

“Ne kemi vërejtur shenja te kontribuesi kryesor në përzierje. Gjurmët më të mëdha kanë qenë nga personi S1, me të vogla kanë qenë nga dy persona tjerë të panjohur”, tha ai.

Kryetari i trupit gjykues, Vesel Ismajli, ka ndërprerë seancën, si pasojë që mbrojtja nuk është e përgatitur për pyetje.

E njëjta do të vazhdojë të martën në ora 13:30.

Ismajli: Mbrojtja është deklaruar se nuk janë të përgatitur për pyetje

“Mbrojtja është deklaruar se nuk janë të përgatitur për pyetje. Seanca e sotshme ndërprehet me kaq, e njëjta vazhdon nesër në 13:30”, tha ai.

Ndërkohë, në seancën e 9 korrikut, të akuzuarit u deklaruan të pafajshëm dhe refuzuan ta lexojnë aktakuzën.

Sipas aktakuzës së Prokurorisë Speciale, më 29.11.2024, në fshatin Varagë, Komuna e Zubin Potokut, në pjesën e kanalit “Ibër Lepenc”, të pandehurit Viqentijeviq, së bashku me disa persona të tjerë ende të panjohur, pas një marrëveshjeje paraprake, kanë vendosur eksploziv (rreth 20 kilogramë të llojit Trinitrotoluene “TNT”) në brendësi të kanalit.

Vëllezërit Viqentijeviq akuzohen se lëndën shpërthyese e kanë aktivizuar përmes një çante, të cilën e kishin lidhur me litar në një shtyllë betoni, ku si pasojë është dëmtuar rëndë struktura e betonit të kanalit “Ibër Lepenc”, është shkaktuar ndërprerje e furnizimit me ujë të pijshëm, është rrezikuar prodhimi i energjisë elektrike dhe ndërmarrjes “Ibër Lepenc” i është shkaktuar dëm në vlerë prej 376,774.70 eurosh.

Sipas aktakuzës, me këto veprime, të pandehurit Viqentijeviq kanë kryer veprën penale “Rrezikimi i rendit kushtetues me shkatërrimin apo dëmtimin e instalimeve publike”, nga neni 122, në lidhje me “Kryerjen e veprës terroriste”. 

Sulmi në “Ibër-Lepenc”, 376 mijë euro dëme

Në Gjykatën Themelore në Prishtinë ka vazhduar të hënën seanca gjyqësore ndaj Dragisha dhe Jovan Viqentijeviqit, si dhe Igor Dimoviqit, të akuzuar për sulmin ndaj kanalit të “Ibër-Lepencit”. Në seancë dëshmoi Ernest Kërçeli, drejtor i Infrastrukturës në “Ibër-Lepenc”, në cilësinë e dëshmitarit dhe përfaqësuesit të palës së dëmtuar.

Me dëshminë e drejtorit të Departamentit të Ujit dhe Gjenerimit në ndërmarrjen “Ibër-Lepenc”, Ernest Kerqeli, ka vazhduar të hënën në Gjykatën Themelore në Prishtinë procesi gjyqësor ndaj tre të akuzuarve për sulmin në kanalin e “Ibër-Lepencit”.

Kerqeli deklaroi para trupit gjykues se shpërthimi i 29 nëntorit 2024 në Varagë të Zubin Potokut i shkaktoi ndërmarrjes dëme prej mbi 376 mijë eurosh, ndërsa furnizimi me ujë për ujësjellësit u ndërpre nga tri deri në pesë ditë.

Ai tregoi se pas njoftimit për shpërthimin, ekipet e ndërmarrjes u mobilizuan menjëherë për të vlerësuar situatën dhe për të siguruar vazhdimin e furnizimit me ujë, veçanërisht për Termocentralin “Kosova B”.

“Kur mbërritëm në vendngjarje pamë se dëmi ishte jashtëzakonisht i madh. Si ndërmarrje nuk ishim ballafaquar asnjëherë me një dëmtim të tillë”, tha Kerqeli.

Sipas tij, pas marrjes së lejes nga Policia e Kosovës, ekipet vendosën një zgjidhje të përkohshme me gjashtë gypa me diametër mbi 900 milimetra, për të mundësuar vazhdimin e rrjedhës së ujit.

Kerqeli theksoi se kanali i “Ibër-Lepencit” është infrastrukturë jetike për vendin, pasi siguron ujë për prodhimin e energjisë elektrike dhe furnizon me ujë të pijshëm mbi gjysmën e popullsisë së Kosovës.

“Pa këtë kanal nuk mund të funksionojë sistemi energjetik i Kosovës. Uji është i domosdoshëm për ftohjen e turbinave të Termocentralit ‘Kosova B’, ndërsa mbi 500 mijë banorë furnizohen me ujë nga ky kanal”, deklaroi ai.

Ai shtoi se gjatë natës së sulmit ishte rikthyer rreth 75 për qind e kapacitetit të furnizimit, por ujësjellësit mbetën me furnizim të kufizuar për disa ditë.

“Furnizimi për ujësjellësit ka qenë i ndërprerë nga tri deri në pesë ditë dhe edhe më pas nuk kanë funksionuar me kapacitete të plota”, tha Kerqeli.

Duke folur për pasojat financiare, ai bëri të ditur se dëmet u sanuan përmes një projekti rehabilitimi të financuar nga një kredi e Bankës Botërore.

“Raporti i përgatitur nga kompania mbikëqyrëse tregon se dëmi i shkaktuar është mbi 376 mijë euro”, u shpreh ai.

I pyetur nga mbrojtja nëse i njihte ose i kishte takuar ndonjëherë të akuzuarit, Kerqeli u përgjigj se nuk i njeh.

Sipas aktakuzës së Prokurorisë Speciale, të tre të pandehurit ngarkohen për armëmbajtje pa leje, ndërsa Dragisha dhe Jovan Viqentijeviqi akuzohen edhe për veprat penale të rrezikimit të rendit kushtetues me shkatërrimin ose dëmtimin e instalimeve publike, kryerjes së veprës terroriste dhe spiunazhit.

Aktakuza lidhet me shpërthimin e 29 nëntorit 2024 në fshatin Varagë të Zubin-Potokut, ku u dëmtua kanali i “Ibër-Lepencit”, një infrastrukturë me rëndësi jetike për furnizimin me ujë dhe energji në Kosovë.

Sipas dokumentit të Prokurorisë, Jovan Viqentijeviqi ka deklaruar gjatë hetimeve se ishte trajnuar në poligonin ushtarak serb “Pasulanske Livade”, së bashku me rreth 120 persona të tjerë, në shtator të vitit 2023.

Prokuroria pretendon se në të njëjtën periudhë në këtë poligon janë stërvitur edhe pjesëtarë të grupit të udhëhequr nga Milan Radoiçiq, i akuzuar për sulmin e armatosur në Banjskë.

Në aktakuzë përfshihet edhe deklarimi i Viqentijeviqit se ishte planifikuar një tjetër sulm në Kosovë gjatë tetorit të vitit të kaluar, por që, sipas tij, ishte anuluar nga Radoiçiqi.

Po ashtu, Prokuroria ka përfshirë në dosje edhe një ekspertizë të Byrosë Federale të Hetimit të SHBA-së (FBI), sipas së cilës në çizmet e të akuzuarve është identifikuar material dheu me përbërje të njëjtë me mostrat e marra në vendin e shpërthimit në kanalin e “Ibër-Lepencit”.

Procesi gjyqësor pritet të vazhdojë me dëgjimin e dëshmitarëve dhe administrimin e provave të tjera të propozuara nga palët.

Nën masa të rrepta sigurie, nis gjykimi për sulmin terrorist në kanalin e Ibër Lepencit

Tre të akuzuarit për sulmin terrorist në kanalin e Ibër Lepencit nw Zubin Potok, Dragisha Viqentijeviq, Jovan Viqentijeviq dhe Igor Dimoviq, janë sjellur të hënën në Gjykatën Themelore në Prishtinë nën masa të rrepta sigurie.

Seanca gjyqësore do të zhvillohet ka nis nw orwn 10:00 në Pallatin e Drejtësisë.

Ndërkohë, në seancën e 9 korrikut, të akuzuarit u deklaruan të pafajshëm dhe refuzuan ta lexojnë aktakuzën.

Sipas aktakuzës së Prokurorisë Speciale më 29.11.24 në fshatin Varagë, Komuna e Zubin Potokut, në pjesën e kanalit “Ibër Lepenc”, të pandehurit Viqentijeviq, së bashku me disa persona të tjerë ende të panjohur, pas një marrëveshje paraprake, kanë vendosur eksploziv (rreth 20 kilogramë të llojit Trinitrotoluene “TNT”) në brendësi të kanalit.

Vëllezërit Viqentijeviq akuzohen se lëndën shpërthyese e kanë aktivizuar përmes një çante të cilën e kishin lidhur me litar në një shtyllë betoni, ku si pasojë është dëmtuar rëndë struktura e betonit të kanalit, “Ibër Lepenc”, është shkaktuar ndërprerje e furnizimit me ujë të pijshëm, është rrezikuar prodhimi i energjisë elektrike, dhe ndërmarrjes “Ibër Lepenc”, i është shkaktuar dëm në vlerë prej 376,774.70 eurosh.

Sipas aktakuzës, me këto veprime, të pandehurit Viqentijeviq kanë kryer veprën penale “Rrezikimi i rendit kushtetues me shkatërrimin apo dëmtimin e instalimeve publike” nga neni 122 në lidhje me “Kryerjen e veprës terroriste”.

comment Për komente lëvizni më poshtë
Sot mund të lexoni Shfletoni kopertinat