​Kuvendi miratoi Rezolutën për vrasjen e grave dhe përgjegjësinë institucionale për parandalim

Aktuale

​Kuvendi miratoi Rezolutën për vrasjen e grave dhe përgjegjësinë institucionale për parandalim

Më: 26 tetor 2026 Në ora: 13:19 Përditësuar në ora: 22:26 më 26.10.2026
Kuvendi i Kosovës

​Kryeziu përmend Sami dhe Mërgim Lushtakun për vrasjen e një gruaje nga një mik i tyre, ndez debat

Deputeti i Partisë Demokratike të Kosovës (PDK), Mërgim Lushtaku, është përplasur në seancën e Kuvendit me deputeten e Lëvizjes Vetëvendosje, Arbëreshë Kryeziu-Hyseni, pasi kjo e fundit përmendi emrin e tij dhe të babait të tij në kontekstin e rastit të vrasjes së një gruaje dhe mikut të saj.

Lushtaku e ka akuzuar Kryeziun-Hysenin për shpifje, duke e ftuar që të njëjtat deklarata t’i përsërisë edhe jashtë Kuvendit, ndërsa ka paralajmëruar padi.

Lushtaku: Kryeziu e di që ka imunitet në foltore dhe shpif qëllimshëm

“Po vjen në shprehje të flas këtu në një rast të tillë ku lakohet edhe emri im dhe i babait tim dhe këtu kam fjalën për Arbëreshë Kryeziun, që përmendi emrin e babait tim që e ka ndërlidhur me një rast të një personi që kryer vrasje, ku ka marrë jetën e gruas dhe mikut të tij, gjë që nuk është as në kulturën tonë. Ajo e di që ka imunitet në foltore këtu dhe shpif qëllimshëm, e ftoj të dalë edhe jashtë kuvendit dhe t’i thotë të njëjtat fjalë dhe padia do t’i vij menjëherë. Duhet të përmbahemi para se të flasim diçka”, tha Lushtaku.

Në përgjigjen e saj, deputetja e Vetëvendosjes, Arbëreshë Kryeziu-Hyseni, tha se reagimi i Lushtakut dëshmon, sipas saj, atë që ajo kishte deklaruar më herët. Ajo ka mohuar se është kërcënuar prej tij, ndërsa ka pretenduar se Lushtaku ka pasur lidhje të afërta me personin për të cilin po diskutohej.

Kryeziu-Lushtakut : Ky zotëria asnjëherë nuk e ka mohuar afërsinë me personin

“A po e shihni se për çka folëm dhe qysh në fund dalin dhe ia vënë vulën kësaj që thamë. A u kërcënova unë tash, a me tha hajde dil jashtë dhe thuaje nëse ke guxim. Kurrë nuk u konvenon juve me u thënë të vërtetën. Deri tash heshtët. Kur ua thua të vërtetën të thonë ta njoh babën e vëllain. Ky zotëria asnjëherë nuk e ka mohuar afërsinë me personin. Të gjithë e dinë që ti ke lidhje të ngushta me të”, tha ajo.

Në këtë debat është përfshirë edhe kryetarja e Kuvendit, Albulena Haxhiu, e cila ka kujtuar një rast të mëhershëm kur, sipas saj, ajo dhe deputetja Arbërie Nagavci ishin akuzuar nga Lushtaku se kishin ardhur të dehura në Kuvend.

Haxhiu ka përmendur edhe një rast kur, sipas saj, kishte pësuar mavijosje gjatë një incidenti në Kuvend, duke thënë se për këtë nuk ishte thirrur nga Prokuroria.

Haxhiu: Krahët i kam pasur të mavijosur nga Mërgim Lushtaku, kur u bë dhunë në Kuvend

“Çka ne flasim këtu na dëgjojnë qytetarët. Më kujtohet shumë mirë kur në një seancë unë jam akuzuar bashkë me Arbërie Nagavcin nga Lushtaku se kemi ardhur në kuvend të dehura… Paramendojeni çfarë efekti ka ajo deklaratë këtu në Kuvend. Po ashtu, unë krahët e mi i kam pasur të mavijosur nga Mërgim Lushtaku kur ka bë dhunë në kuvend, por mua nuk më ka thirrur prokuroria”, tha ajo.

Në replikën e tij, Lushtaku tha se lëndimet mund të ndodhin gjatë aksioneve politike, ndërsa ka ftuar deputetët që deklaratat e tyre t’i bëjnë edhe jashtë Kuvendit dhe të përballen me ligjin.

Lushtaku: Edhe ju keni lënduar, kur ka aksione politike dikush lëndohet

“Edhe ju keni lënduar, kur ka aksione politike dikush lëndohet. Unë i ftoj të gjithë ata që folin në foltore të flasin jashtë Kuvendit që ne të ballafaqohemi me ligjin. Asnjëherë nuk thashë të ballafaqohemi fizikisht”, tha ai.

Kuvendi miraton me 67 vota rezolutën për mbrojtjen e grave dhe parandalimin e dhunës në baza gjinore

Kuvendi i Kosovës ka miratuar me 67 vota për rezolutën që trajton vrasjen e fundit në Vitomiricë të Pejës, rastet e tjera të vrasjes së grave, dhunën në familje ndaj grave dhe fëmijëve, si dhe përgjegjësinë institucionale për parandalimin e këtyre dukurive.

Rezoluta vë në fokus nevojën për parandalimin e dhunës në baza gjinore, forcimin e mekanizmave institucionalë dhe mbrojtjen e jetës dhe sigurisë së grave.

Përmes kësaj rezolute, theksohet rëndësia e reagimit institucional ndaj rasteve të dhunës në familje, trajtimit me seriozitet të çdo raportimi dhe marrjes së masave konkrete për të parandaluar përshkallëzimin e dhunës, e cila mund të përfundojë me pasoja fatale.

Një tjetër çështje e rëndësishme që trajtohet është përgjegjësia e institucioneve për të garantuar mbrojtjen e viktimave, për të përmirësuar bashkëpunimin ndërinstitucional dhe për të siguruar që gratë dhe fëmijët të kenë qasje në mbështetjen dhe mbrojtjen e nevojshme.

​Deputetët debatojnë për fotografitë e Daut Haradinajt dhe Albin Kurtit me të përfshirët në vrasje grash

Deputeti i Lëvizjes Vetëvendosje, Taulant Kelmendi, në seancën e Kuvendit të Kosovës ka ngritur çështjen e fotografive të anëtarit të Aleancës Daut Haradinaj, me personin që e ka cilësuar si dorasin e Arlinda Sylaj-Zekajt dhe me bashkëshortin e viktimës.

Kelmendi tha se fotografitë dhe afërsia politike nuk përbëjnë domosdoshmërisht dëshmi të përgjegjësisë penale, por sipas tij, ato ngrenë pyetje legjitime dhe publiku ka të drejtë të kërkojë llogari.

Kelmendi: Fotografitë s’janë domosdoshmërisht dëshmi e përgjegjësisë penale, ato ngrehin pyetje legjitime

“Kemi raste kur ish-kryeministra, ish-deputetë e ish-kryetar të partive, për të cilët janë ngritur publikisht akuza apo pretendime për dhunë në familje. Në anën tjetër, kemi disa sekrete publike me të cilat i kemi pasur gjatë gjithë ditës në rrjete sociale, ku kultivohen raporte me vrasës e doras e madje edhe me dorasin dhe burrin e viktimës. Fotografitë shoqërimet dhe afërsia politike nuk është domosdoshmërisht dëshmi e përgjegjësisë penale të askujt. Ato ngrehin pyetje legjitime. Në këtë kontekst para moralizimit duhet një distancim, publiku ka të drejtë të kërkoj llogari për fotografitë. Madje, janë të përfshirë edhe ata që thoshin se qytetarët kanë pasur bomba nëpër xhepa. A distancohet sot zonja deputete me dorasin”, tha Kelmendi.

Ndërsa, deputetja e Aleancës Time Kadrijaj, ka kundërshtuar politizimin e rastit, duke thënë se përgjegjësia për vrasjen dhe parandalimin e rasteve të tilla u takon institucioneve të sigurisë.

Ajo ka përmendur edhe një fotografi të Naim Murselit me kryeministrin Albin Kurti, duke pyetur nëse për këtë fotografi janë bërë akuza të ngjashme.

Kadrijaj: A e keni dëgjuar dikë që ka akuzuar Albin Kurtin për foto me Naim Murselin

“Nuk kemi dashur me politizuar, sepse njerëzit nuk kanë pasur faj nëse ka ndodhur një vrasje. Shpërqendrimi i vëmendjes dhe kalimi i përgjegjësisë prej institucioneve tek individët kjo nuk ka kuptim. Unë kam një foto që Naim Murseli me burgim të përjetshëm është në foto me Albin Kurtin. A keni ndonjë sqarim këtu, a e keni dëgjuar dikë që ka akuzuar Albin Kurtin për këtë foto, nuk e ka akuzuar askush. Ky është shpërqendrim i vëmendjes, përgjegjësia është e institucioneve të sigurisë”, tha Kadrijaj.

Në replikën e tij, Kelmendi i është drejtuar deputetes Kadrijaj me një thirrje për ta ndihmuar dorëzimin e personit, të cilit i referohej në organet e drejtësisë.

Kelmendi: A mund ta shfrytëzoni këtë shoqëri që ta telefononi dorasin dhe të dorëzohet

“A mund ta shfrytëzoni këtë shoqëri që ta telefononi dorasin dhe të dorëzohet para organeve ligjzbatuese”, tha ai.

Rasti i Arlindës, Sveçla: Kërkova nga IPK-ja të hetojë veprimet e policisë

Ministri i Brendshëm, Xhelal Sveçla, ka bërë të ditur se ka kërkuar nga Kuvendi formimin e një komisioni hetimor parlamentar për të shqyrtuar veprimet dhe mosveprimet e institucioneve në rastin e Arlinda Zekajt.

Nga foltorja e Kuvendit, Sveçla ka thënë se menjëherë pas marrjes së lajmit për rastin, ka kërkuar hetim nga Inspektorati Policor i Kosovës për veprimet ose mosveprimet e pjesëtarëve të Policisë së Kosovës.

Megjithatë, ai ka theksuar se përgjegjësia duhet të shqyrtohet edhe për institucionet e tjera të përfshira në këtë zinxhir.

“Por pyetja tjetër që ka lindur është: Çka me institucionet e tjera? Me Prokurorinë, me Gjykatën, me Qendrën për Punë Sociale, e cila është në varësi të komunës, me Mbrojtësin e Viktimave, me vetë IPK-në”, ka deklaruar Sveçla.

Ai ka thënë se secili institucion ka përgjegjësinë e vet dhe se, në mungesë të mekanizmave të tjerë për të kërkuar llogaridhënie, i është drejtuar Kuvendit me kërkesën për formimin e një komisioni hetimor parlamentar.

“Kam kërkuar nga Parlamenti që të bëjë komision hetimor parlamentar në mënyrë që të gjitha institucionet të vijnë para jush në komision dhe të japin llogaridhënie për veprimet apo mosveprimet e tyre”, tha ministri.

Haxhiu: Para vitit 2021 nuk u ndërmorën veprime për adresimin e femicidit dhe krimeve të luftës

Kryetarja e Kuvendit, Albulena Haxhiu, ka deklaruar se para vitit 2021 nuk janë ndërmarrë veprime institucionale për adresimin e femicidit dhe krimeve të luftës, duke thënë se gjatë kohës sa ishte ministre e Drejtësisë është përballur me mungesë të vazhdimësisë institucionale në këto fusha.

Duke folur në seancën ku po diskutohet vrasja e Arlinda Zekajt, Haxhiu tha se angazhimi për trajtimin e dhunës ndaj grave lidhet me përgjegjësinë e institucioneve, ndërsa theksoi se gjatë mandatit të saj si ministre kishte kërkuar që ministri i Drejtësisë të ishte koordinator nacional për adresimin e dhunës në familje.

“Sepse të flasësh pikërisht për shkak të përgjegjësisë që ndjejmë si institucione në raport me vrasjen e vajzave dhe grave në Republikën e Kosovës. Më besoni apo jo, por 2 prej çështjeve për të cilat asnjëherë nuk janë ndërmarrë veprime, nga institucionet para 2021-s, është pikërisht rasti i femicidit, për adresimin e femicidit, dhunës në familje, pra vrasjen e grave, por edhe raste të krimeve të luftës. Pra, unë si ministre në atë kohë, jam ballafaquar me sfida të mëdha, sepse nuk kam gjetur as zyrë, as dokument, as vazhdimësi institucionale ku është dashur të bazohet edhe vetëm me vazhduar ndërmarrjen e veprimeve. Dhe pikërisht për këtë arsye, unë kam kërkuar nga Komisioni atëherë për të Drejtat e Njeriut që koordinatori nacional për adresimin e dhunës në familje të jetë pikërisht ministri i Drejtësisë, jo zëvendësministri. Është pikërisht ministri i Drejtësisë për të ngritur përgjegjësinë institucionale në raport me rastet e vajzave dhe grave, që po dhunohen në shtëpitë e tyre, në rrugë, në shkollë, kudo”, tha ajo.

Haxhiu tha se gjatë kohës sa ishte ministre kishte hasur edhe në qëndrime se dhuna në familje duhej të mbetej çështje private, por theksoi se kjo nuk e kishte ndalur angazhimin e saj institucional.

“Ka pasur shumë raste kur më kanë thënë: “Çka po merresh me dhunën në familje? Është çështje që duhet të mbetet brenda mureve të shtëpisë, nuk është punë e jotja.” Përkundër këtyre deklarimeve, nuk janë ndalur për asnjë moment. Gjatë mandatit tim si ministre e Drejtësisë, për adresim të përgjegjësive që kemi pasur si institucione të Republikës së Kosovës, në raport me këto raste. Është e vërtetë që ligji është miratuar nga Kuvendi i Republikës së Kosovës, Konventa e Stambollit po ashtu, dhe ne jemi munduar që strategjinë që zoti Ramadani e përmendi t’ia përshtasim kërkesave që ka Konventa e Stambollit”, tha Haxhiu.

Përplasje mes Haxhiut dhe Hazirit në Kuvend gjatë debatit për vrasjen e Arlindës

Kryetarja e Kuvendit, Albulena Haxhiu, është përplasur me deputetin e LDK-së, Lutfi Haziri, gjatë seancës ku po diskutohej për vrasjen e Arlinda Zekajt.

Përplasja erdhi pas fjalimit të Hazirit, i cili kritikoi Qeverinë për përgjegjësinë në garantimin e sigurisë juridike dhe fizike të qytetarëve. Haxhiu iu kundërpërgjigj duke akuzuar qeveritë e kaluara për mungesë veprimesh ndaj dhunës kundër grave dhe duke thënë se veprimet institucionale në këtë drejtim kanë nisur në vitin 2021.

Haziri tha se siguria juridike dhe fizike e qytetarëve është ndër detyrat kryesore të Qeverisë, duke vlerësuar se institucionet kanë dështuar në këtë përgjegjësi në rastin e Arlindës.

“Po e lidh me mandatin e qeverisë që detyrën e parë prej të gjitha detyrave të tjera e ka sigurinë juridike të qytetarëve dhe sigurinë fizike të tyre. A ka dështuar në dy detyrat qeveria, ajo që po themi që ka rënë shteti në rastin e të ndjerës. Nëse flasim për një vit, ku kanë mbërritur rastet tjera me u zbardhë apo cila është masa për t’u parandaluar. Nuk mundesh me u distancu prej detyrës së sigurisë juridike dhe fizike që shteti e ka ndaj qytetarëve të vet. Kryeministri Kurti duhet me shfrytëzua këtë mundësi… Ne nuk jemi familje që vrasim gra. Shqiptarët e kanë të rregulluar familjen ku gruaja ka rol, ne jemi të lindur prej nënave, se ende ligji nuk lejon që ne të lindim nga burrat, tendencën që e ka qeveria me e prua edhe ata”, tha Haziri.

Ndërkaq, Haxhiu kritikoi LDK-në për qasjen ndaj dhunës kundër grave gjatë kohës kur kjo parti ka qenë në pushtet, duke thënë se qeveritë e kaluara nuk kanë ndërmarrë veprime të mjaftueshme.

“Keni qeverisur herë vetë e herë bashkë, kurrë asnjë veprim nuk keni ndërmarrë dhe kurrë asnjë kryeministër që ka folë për dhunën ndaj grave, për femicidin, asnjëherë. Për herë të parë kanë filluar të merren veprime në 2021. Kur jam bërë ministre e Drejtësisë, kam pyetur cilat janë veprimet që janë ndërmarrë, asnjë. Nuk është në rregull që sot ta keqpërdorni këtë foltore të Kuvendit me akuza të pabaza. Kryeministrat e kaluar dhe ministrat kanë menduar se nuk është punë e tyre të merren me dhunën ndaj grave, por është. E për shkak të mosveprimeve tuaja, ne sot përballemi me situata të tilla. Keni kujdes çka flisni”, tha ajo.

Rasti i Arlinda Zekës, Gashi: Institucionet kanë përgjegjësi

Deputeti i LDK-së Arben Gashi, ka reaguar pas ngjarjes së rëndë që ndodhi në Vitomiricë ku u vra Arlinda Zekaj.

Dyshohet se ajo u privua nga jeta nga kunati i saj.

Gashi në fjalimin e tij, ngriti disa shqetësime lidhur me rastet e vrasjes së grave në Kosovë, sidomos për parandalimin e tyre.

“Ne në këtë Kuvend këtu, shumë herë kemi diskutu, shumë herë kemi debatu për çështjen që pajtohemi e nuk pajtohemi. Por, institucionet kanë memorie dhe kanë përgjegjësi dhe kanë llogaridhënie”, deklaroi Gashi në fjalimin e tij.

Matoshi përmend Sami Lushtakun në Kuvend: Më krahasoi me dikë që del prej një shtëpie publike

Deputetja e Lëvizjes Vetëvendosje, Adriana Matoshi, ka përmendur kryetarin e Komunës së Skenderajt, Sami Lushtakun, gjatë seancës së jashtëzakonshme të Kuvendit të Kosovës, të thirrur pas vrasjes së Arlinda Zekajt në Pejë.

Në fjalën e saj, Matoshi iu referua një deklarate të mëparshme të Lushtakut ndaj saj, duke kritikuar gjuhën e përdorur ndaj grave që shprehin publikisht qëndrimet dhe kritikat e tyre, raporton KosovaPress.

Ajo theksoi se deklaratat e tilla, kur vijnë nga persona që mbajnë poste publike, kanë ndikim përtej individit ndaj të cilit drejtohen.

“Sami Lushtaku më krahasoi me dikë që del prej një shtëpie publike. E tha pasi ishte pyetur për kritikat e mia ndaj tij. Kështu zgjodhi t’i përgjigjet një gruaje që kundërshtonte publikisht. Kur një kryetar komune e përdor këtë gjuhë, pesha e saj shkon përtej gruas që ai fyen”, tha ajo.

Deputetes së LVV-së i reagoi shefi i Grupit Parlamentar të PDK-së, Arian Tahiri, i cili i kërkoi asaj të mos moralizojë.“Nuk duhet deputetja paraprake të moralizojë e të tentojë të krijojë situata ku nxitet problemi, pse ndodh problemi dhe të bëjë betejë politike. Se gjashtë vjet kryeministër i Kosovës është dhe e udhëheq këtë vend. Nuk e dija a është duke folur një deputet i opozitës apo kryeministri i Kosovës, Albin Kurti”, tha Tahiri.

Kurti me dy propozime pas rastit të Arlindës: Rishikim urgjent i rasteve me rrezik të lartë

Kryeministri i Kosovës, Albin Kurti, ka folur në seancën e sotme për vrasjen e Arlinda Zekajt në Vitomericë të Pejës, duke kërkuar masa konkrete institucionale për parandalimin e rasteve të dhunës ndaj grave.

Kurti theksoi se as zhgënjimi, as xhelozia dhe as ndjenja e refuzimit nuk mund të justifikojnë dhunën, duke nënvizuar se askush nuk ka të drejtë t’ia mohojë tjetrit mundësinë për t’i dhënë fund një marrëdhënieje.

“As zhgënjimi, as xhelozia dhe as ndjenja e refuzimit, nuk e bëjnë legjitime përpjeken për ta detyruar dikë të qëndrojë. Askush nuk mund ta kërkojë vazhdimin e një marrëdhënie, duke ia mohuar tjetrit të drejtën për të dalë prej saj. Dhuna e vendosë pikërisht këtë detyrim, që gruaja ta organizojë jetën sipas frikës nga dhunuesi”, u shpreh ai.

Ai propozoi dy ndërhyrje konkrete, me synimin për të rritur përgjegjësinë institucionale dhe për të përmirësuar mbrojtjen e personave që janë në rrezik.

“Propozoj dy ndërhyrje konkrete, të ngarkojmë Ministrinë e Punëve të Brendshme që përmes strukturave kompetente të policisë të organizojë brenda 72 orëve rishikimin urgjent të rasteve aktive me rrezik të lartë. Për secilin rast të dokumentohen masat e sigurisë, zyrtari përgjegjës për ndjekjen e tyre dhe bashkërendimi me institucionet përkatëse, qëndrore dhe lokale, përfshirë zbatimin policor të urdhërave mbrojtës dhe reagimin ndaj alarmeve të mbikqyrjes elektronike”.

“Gjithashtu, brenda 72 orëve, Ministria e Drejtësisë të vijë me një raport të detajuar që zbardh gjithë reagimin apo mosreagimin e secilës hallk të zinxhirit institucional në këtë rast”, u shpreh Kurti.

Kurti: Arlinda kërkoi, por nuk e mori mbrojtjen që i duhej për të mbetur gjallë

Kryeministri i Kosovës, Albin Kurti, ka kërkuar hetim të plotë dhe të menjëhershëm për vrasjen e Arlinda Zekajt në Vitomiricë të Pejës, duke theksuar se viktima kishte paralajmëruar për rrezikun ndaj jetës së saj vetëm tri ditë para se të vritej.

Duke folur në Kuvend, Kurti ka thënë se Arlinda Zekaj nuk e mori mbrojtjen që i nevojitej për të shpëtuar jetën.

“Një bashkëqytetare e jona kërkoi, por nuk e mori mbrojtjen që i duhej për të mbetur gjallë. Arlinda Zekaj u vra dje. Vrasja mizore e Arlinda Zekajt është tronditëse për të gjithë ne”, ka deklaruar Kurti.

Ai përmendi se si tri ditë para vrasjes, Arlinda i ishte drejtuar Prokurorisë, duke paralajmëruar për rrezikun ndaj jetës së saj.

Sipas Kurtit, këto rrethana kërkojnë hetim të plotë dhe të menjëhershëm, ndërkohë që i dyshuari për vrasjen vazhdon të jetë në arrati.

Ndër të tjera, kryeministri ka kërkuar që prokuroria dhe institucionet përgjegjëse të sqarojnë se si janë trajtuar denoncimet e viktimës dhe pse paralajmërimi për rrezikun ndaj jetës së saj nuk u pasua me masa konkrete mbrojtëse.

“Çdo shkelje duhet të zbardhet”, ka theksuar Kurti nga foltorja e Parlamentit.

Sot mund të lexoni Shfletoni kopertinat