LIVE: Konjufca mbledh deputetët për strategjinë e apelimit në Hagë, në takim edhe LDK-ja

Aktuale

LIVE: Konjufca mbledh deputetët për strategjinë e apelimit në Hagë, në takim edhe LDK-ja

Më: 7 nëntor 2026 Në ora: 12:21 Përditësuar në ora: 12:56 më 07.11.2026
Glauk Konjufca

Çitaku për takimin rreth apelit në Hagë: Duhet të flasë puna, jo deklaratat

Ushtruesja e detyrës së kryetares së PDK-së, Vlora Çitaku, ka deklaruar se anëtarët e grupit punues për strategjinë shtetërore lidhur me apelimin e aktgjykimit ndaj ish-krerëve të UÇK-së janë pajtuar që diskutimet të mbeten konfidenciale.

Çitaku tha se fokusi duhet të jetë te puna konkrete dhe jo te deklaratat publike, derisa takimi i grupit punues po zhvillohet në ndërtesën e Qeverisë së Kosovës.

“Jemi dakorduar për konfidencialitetin e këtij grupi. Duhet të flasë puna, jo deklaratat. Disa marrëveshje po, disa jo për publik”, tha Çitaku.

Grupi punues, i udhëhequr nga ministri i Punëve të Jashtme, Glauk Konjufca, është themeluar për hartimin dhe bashkërendimin e strategjisë shtetërore lidhur me procedurën e apelimit të aktgjykimit të shkallës së parë ndaj Hashim Thaçit, Kadri Veselit, Jakup Krasniqit dhe Rexhep Selimit në Hagë.

Në takim po marrin pjesë përfaqësues të partive parlamentare, përfshirë Vlora Çitakun nga PDK-ja, Jehona Lushaku-Sadriun nga LDK-ja, Bekë Berishën nga AAK-ja dhe Adnan Rrustemin nga Lëvizja Vetëvendosje.

Konjufca mbledh deputetët për strategjinë e apelimit në Hagë, në takim edhe LDK-ja

Ka nisur takimi i parë i grupit punues për hartimin dhe bashkërendimin e strategjisë shtetërore lidhur me apelimin e aktgjykimit të shkallës së parë ndaj ish-krerëve të UÇK-së në Hagë.

Takimi po mbahet në ndërtesën e Qeverisë së Kosovës, me dyer të mbyllura për mediat, ndërsa udhëhiqet nga ministri i Punëve të Jashtme, Glauk Konjufca.

Në takim kanë mbërritur deputetja e PDK-së dhe ushtruesja e detyrës së kryetares së kësaj partie, Vlora Çitaku, deputetja e LDK-së, Jehona Lushaku-Sadriu, deputeti i AAK-së, Bekë Berisha, si dhe Adnan Rrustemi nga Lëvizja Vetëvendosje.

Grupi punues është themeluar nga Qeveria e Kosovës për hartimin dhe bashkërendimin e strategjisë shtetërore lidhur me procedurën e apelimit të aktgjykimit të shkallës së parë ndaj Hashim Thaçit, Kadri Veselit, Jakup Krasniqit dhe Rexhep Selimit.

Ministri Konjufca kishte paralajmëruar se takimi do të zgjasë disa orë dhe se angazhimi i grupit punues do të vazhdojë gjatë gjithë ditës.

Sot mund të lexoni Shfletoni kopertinat