Mes polemikave, përplasjeve dhe akuzave ndërmjet deputetëve, Komisioni për Ekonomi, Industri, Ndërmarrësi, Tregti dhe Inovacion ka vendosur të largojë nga rendi i ditës raportimin e anëtarëve të Komisionit të Autoritetit të Konkurrencës së Kosovës, ndërsa ka miratuar përfshirjen e Projektligjit për Rregullatorin e Energjisë (ZRRE). Për këtë çështje po raporton ministrja e Ekonomisë Artane Rizvanolli.
Largimi i pikës për raportimin e Autoritetit të Konkurrencës është propozuar nga deputeti Artan Asllani, me arsyetimin se përfaqësuesit e këtij institucioni nuk ishin të pranishëm në mbledhje, ndonëse ishte paraparë raportimi i tyre lidhur me gjendjen në këtë institucion.
Asllani: Është pika e 4 e rendit të ditë, propozoj me u largu prej rendit ditës
“Po propozoj diçka të thjeshtë, po e shohim edhe prezencën, është pika e 4 e rendit të ditë, propozoj me u largu prej rendit ditës, sepse, është bërë temë e diskutimit për një kohë të gjatë dhe po e shohim se ata nuk janë prezent dhe kërkoj mos me qenë pikë e rendit të ditës”, tha Asllani.
Propozimi i tij ka nxitur reagime nga deputetët e opozitës. Deputeti i PDK-së, Mërgim Lushtaku, ka thënë se nuk është përgjegjësi e deputetëve të vendosin nëse përfaqësuesit e një institucioni të ftuar duhet të paraqiten apo jo.
Lushtaku: Ne i kemi ftuar, ata a dinë a nuk vinë është përgjegjësi e tyre
“Sa i përket pikës së katër që zotëri Asllani propozoj, nuk më vjen mirë që asnjë deputet të merr punën e zëdhënësit të një institucioni tjetër, sepse ne i kemi ftuar, ata a dinë a nuk vinë është përgjegjësi e tyre”, tha Lushtaku.
Në përplasjet e mëtejshme është përfshirë edhe deputeti nga LDK, Ermal Sadiku, i cili e ka kritikuar Asllanin për propozimin e tij, duke e cilësuar si hipokrizi faktin që kishte kërkuar largimin e një pike, pasi më herët kishte kundërshtuar një propozim për shtimin e një pike tjetër.
Sadiku: Është kulmi i hipokrizisë Artan
“Po thoni me heq nga rendi i ditës një pikë sepse nuk ka pasur kohë me u marrë vesh për atë. Është kulmi i hipokrizisë Artan, nëse po don me shtu në rend të ditës një diçka, e po don me heq diçka që s’ka pas kohë, a je tu ditë për çka votove më herët”, tha Sadiku.
Asllani ka reaguar duke thënë se diskutimi ka degraduar dhe se nuk mund të vazhdojë në atë formë.
Asllani: Debati u degradua dhe shkoj me një shkallë jo të mirë
“Aq shumë diskutuat këtu sa u bë në pyetje a po e kuptoj ehde shqipen apo jo, kjo është për mua e papranueshme dhe nuk mund me vazhdu me qenë. Debati u degradua dhe shkoj me një shkallë jo të mirë”, tha Asllani.
Ndërsa deputeti nga LVV, Ilir Kërçeli ka reaguar për mungesën e përfaqësuesve të Autoritetit të Konkurrencës, duke thënë se kryesuesja e këtij institucioni nuk ishte paraqitur për raportim.
Kerceli: Kryesuesja nuk po na vjen në raportim, nuk mundemi me urdhëru me ardhë
“Kryesuesja nuk po na vjen në raportim, nuk mundemi me urdhëru me ardhë. E ka obligim me ardhë, a i shkarkojmë o burra”, tha ai.
Ndërkohë, një tjetër përplasje ka ndodhur lidhur me propozimin e deputetit të LVV-së, Taulant Kelmendi, për përfshirjen në rendin e ditës të Projektligjit për Rregullatorin e Energjisë.
Kelmendi ka kërkuar që projektligji të shqyrtohet në mbledhjen e sotme, me arsyetimin se Qeveria ia ka përcjellë Kuvendit më 6 nëntor 2026 dhe se ndërlidhet me përmbushjen e obligimeve të Kosovës në kuadër të Planit të Rritjes së Bashkimit Evropian, nga i cili vendi përfiton një paketë prej 882 milionë eurosh.
Kelmendi: Kam një propozim, shqyrtimi i projektligjit për rregullatorin e energjisë
“Një propozim, shqyrtimi i projektligjit për rregullatorin e energjisë, për arsyejen se qeveria e ka dërguar kuvend me 6 nëntor 2026, përderisa ky projektligj dihet edhe me planin e rritjes të BE-së ku përfiton Kosova në paketë prej 882 milionë euro, dhe matja bëhet në faza gjashtëmujore, këste gjashtëmujore. Për efikasitet edhe të komisionit tonë, konsiderojmë që është mirë të shtohet. Meqenëse ministrja është këtu, është edhe e gatshme të prezantojë projektligjin, nuk e shoh problem nëse e shtojmë si pikë të re të rendit të ditës. E kemi edhe planin e punës”, tha Kelmendi.
Por, propozimi i tij është kundërshtuar nga kryetari i komisionit, Arben Mustafa, i cili ka shprehur habinë që një projektligj i kësaj rëndësie po kërkohet të trajtohet pa kaluar as 24 orë nga pranimi i tij nga komisioni.
Ai ka kritikuar edhe vonesat në trajtimin e Projektligjit për Efiçiencë të Energjisë, duke theksuar se komisioni ka rreth një muaj që pret ta shqyrtojë atë.
Mustafa: Me thënë të drejtën jam i befasuar me këtë propozim, për shkak se ende nuk janë bërë 24 orë
“Me thënë të drejtën jam i befasuar me këtë propozim, për shkak se ende nuk janë bërë 24 orë prej që e kemi pranuar ne si komision këtë projektligj. Duke qenë se bëhet fjalë për një projektligj kaq të rëndësishëm. Mendoj se ish dashtë me pas kohë deputetët të paktën me lexuar. Ende nuk janë bërë 24 orë dhe kërkoni me fut në rend dite. Anën tjetër kemi një muaj që presim me trajtu ligjin për eficiencë, mirëpo nuk mund të trajtojmë për shkak se herë nuk vini ju, here nuk vjen ministrja. Nuk po e kuptoj këtë nguti për këtë projektligj. Duhet pasur pak respekt edhe për punën e komisionit. Deputet këtu nuk jemi ardhur vetëm t’i kalojmë ligjet qeverisë, jemi ardhë për t’i trajtuar edhe në asketin përmbajtjesor. Ju kisha lut që të kemi mirëkuptim dhe të shtyjmë këtë projektligj për mbledhjen e radhës”, tha Mustafa.
Ndërkaq, Kelmendi i është kundërpërgjigjur, duke thënë se propozimi duhet të hidhet në votim dhe se nuk ka nevojë për komente nga deputetët për secilën kërkesë.
Kelmendi: Nuk ka nevojë për komentim secilit propozim, ekziston mekanizimi i votimit
“Ju jeni kryetar i komisionit, megjithatë jeni i pari në mesin e të paraparëve , dhe nuk ka nevojë për komentim secilit propozim. Nuk ka nevojë askush të komentojë propozimin e tjetrit, për këtë ekziston mekanizimi i votimit”, tha Kelmendi.
Mustafa ka vazhduar kundërshtimin, duke thënë se deputetët nuk kanë pasur mundësi ta analizojnë projektligjin brenda një kohe kaq të shkurtër.
Mustafa: Unë jam i sigurte që as ti, as koleget e tu nuk besoj se dikush ka arrij të analizojë këtë projektligj
“Nëse ju e mendoni se ky projektligj veç mundet me hy në rend ditë, i keni votat në komision, e kaloni, mirëpo kjo tregon sa i rëndësishëm është për ju ky projektligj. Unë jam i sigurte që as ti, as koleget e tu nuk besoj se dikush ka arrij të analizojë këtë projektligj për më pak se 24 orë që na ka ardhë, dhe dëshironi të futni në votim vetëm sa për të kaluar. Kjo është e drejtë e juaja, tregon sa përnime e keni”, tha Mustafa.
Në diskutim është përfshirë edhe deputeti i PDK-së, Mërgim Lushtaku, i cili i është referuar Rregullores së Kuvendit, duke thënë se deputetët duhet të kenë së paku tri ditë kohë për t'u përgatitur për shqyrtimin e një pike të rendit të ditës.
Lushtaku: Nëse argumenti është në anën tonë, arroganca e votës mund të jetë në anën e juaj
“Sipas nenit 34 ne së paku 3 ditë kemi kohë për me ftuar për një pikë të rendit të ditës. E kuptoj ju jeni mazhorancë, dhe më shumë jeni, parti që mendon dikush tjetër për ju, në këtë rast qeveria, sesa ju, për vetveten e juaj. Por, besoj se dikush ka dëshirë me lexu materialet, ka dëshirë me i konsultu edhe me palë të tjera para se me ardhë me marrë një qëndrim. Këto ligje janë të rëndësishme, gjitha kanë kohën e vet sipas rregullores që ne gjithë deputetet jemi pajtuar. Sigurisht ju mundeni mi mbivotu, sepse, ne e dimë shumë mirë se nëse argumenti është në anën tonë, arroganca e votës mund të jetë në anën e juaj”, tha Lushtaku.
Komisioni është duke vazhduar me raportimin e ministres së Ekonomisë, Artane Rizvanolli pa anëtarët e nga opozita.