Shtyhet sërish rifillimi i Kategorisë së Parë dhe të Dytë për shkak të reshjeve të dendura të shiut.
Lajmin e ka bërë të ditur zyra e shtypit në FSHF.
Sipas Federatës Shqiptare të Futbollit, reshjet janë parashikuar të dendësohen në fundjavë dhe kjo gjë mund të sjellë problematika të mëdha në infrastrukturën e shumë skuadrave.
Rifillimi i ndeshjeve është planifikuar më 6 shkurt.
“Federata Shqiptare e Futbollit bën me dije se rifillimi i aktivitetit të Kategorisë së Parë dhe Kategorisë së Dytë do të shtyhet sërish.
Zyra e shtypit në FSHF njofton se vendimi është marrë për shkak të reshjeve të shiut, që parashikohen në fundjavë e që mund të krijojnë problematika të mëdha në infrastrukturën e shumë skuadrave.
Në këto kushte, Sektori i Garave në FSHF ka planifikuar që rifillimi i ndeshjeve në të dyja kategoritë të ndodhë fundjavën pasardhëse, më konkretisht 6 shkurt 2021.
Ndërkohë, lidhur me këtë ndryshim të kalendarit janë njoftuar edhe klubet e Kategorisë së Parë dhe Kategorisë së Dytë”, njofton FSHF.
