Nëntëshi i Kombëtares së Kosovës, Vedat Muriqi, pas lojës së Kosovës me Spanjën ka treguar arsyet pse Kosova dështoi sot të marrë pikë në Sevillë.
Sulmuesi tha se ndeshjen e filluan mirë, por goli i parë i Spanjës ndikoi negativisht në skuadër. Rrjedhimisht u pranua edhe goli i dytë, e që nuk pritej pas 2-3 minutave.
“Besoj se e filluam ndeshjen mirë, e morëm një gol që ishte supergol. Mundemi vetëm t’ia urojmë. Ndoshta do duhej pak më shpejtë të reagojmë aty. Ndodhin këto me këto skuadra. Nuk pritej të marrim golin e dytë pas 2-3 minutave, kjo na pengoi pak të vazhdojmë lojën tonë.
Pastaj shënuam, por edhe filloi lodhja sepse bënim shumë presion, e dimë fuqinë e Spanjës. Ishte një ndeshje që për neve është një eksperiencë e mirë”, ka thënë Muriqi.
Tutje, Muriqi u përgjigj në pyetjen se a po çalon Kosova menjëherë pas po pranon gol, sepse diçka e ngjashme ndodhi edhe në ndeshjen e parafundit ku Kosova humbi nga Suedia me rezultat 3-0.
“Unë besoj se kur po shënojmë golin e parë, po jemi pak mentalisht e lehtë, jo e dobët. Ngase kur po pranojmë golin e parë, nuk po mundemi me reagu shpejt për të nxjerr turbulencën që e kemi në kokë. Shpresoj që ditët në vijim do të përmirësohemi sepse çdo ditë e më shumë po përmirësohemi mentalisht”, tha Muriqi.
