Autorja bestseller Jillian Lauren është qëlluar nga policia dhe është akuzuar për tentativë vrasjeje, pasi u përfshi në një kërkim për të dyshuarit e një aksidenti me largim nga vendi i ngjarjes, raporton BBC News.
Ngjarja ndodhi gjatë një ndjekjeje nëpër rrugët e Los Anxhelosit të martën, ndërsa oficerët po përpiqeshin të gjenin tre të dyshuar që dyshohet se ishin larguar nga vendi i një aksidenti automobilistik.
Lauren u përfshi në këtë situatë kur një nga të dyshuarit përfundoi në rrugën ku ajo jeton me bashkëshortin e saj, basistin e grupit Weezer, Scott Shriner.
51-vjeçarja doli nga shtëpia me një armë dhe refuzoi ta hidhte poshtë, pavarësisht "kërkesave të shumta", sipas një njoftimi për media nga policia e Los Anxhelos. Ajo “më pas e drejtoi armën ndaj oficerëve”, të cilët e qëlluan në shpatull. Ngjarja ndodhi në oborrin e pasmë të shtëpisë së saj në lagjen moderne Eagle Rock në verilindje të Los Anxhelos.
Sipas raportimeve të mediave lokale, Lauren kishte gjuajtur me armë ndaj njërit prej të dyshuarve për aksidentin, pasi ai kishte tentuar të hynte në pronën e saj.
Pasi u qëllua nga policia, 51-vjeçarja u kthye brenda në shtëpi, ku qëndroi për rreth gjysmë ore, përpara se të dilte sërish jashtë me dado-n dhe të dorëzohej para policisë.
Të dyja gratë u ndaluan nga policia, dhe Lauren u trajtua për plagë që nuk rrezikonin jetën në një spital lokal.
Një pistoletë 9-milimetërshe u gjet në shtëpinë e saj dhe ajo më pas u akuzua për tentativë vrasjeje.
Policia Rrugore e Kalifornisë arrestoi menjëherë shoferin e dyshuar për aksidentin, sipas zëdhënësit të agjencisë, Daniel Keene.
I dyshuari u gjet vetëm me të brendshme në oborrin e një shtëpie pranë rezidencës së Shriner.
Helikopterët e lajmeve më herët e kishin filmuar atë duke hequr rrobat, duke kërcyer në një pishinë dhe duke ujitur bimët e pronës, në një përpjekje për t’u kamufluar me lagjen.
Identiteti i tij nuk është bërë publik. Dy të dyshuarit e tjerë janë ende në arrati.
Lauren, e njohur gjithashtu me emrin Jillian Shriner, është autore e dy memoareve bestseller, përfshirë librin e vitit 2010 Some Girls: My Life in a Harem – ku përshkruan përvojat e saj në harem të princit Jefri Bolkiah të Bruneit.
Në vitin 2023, ajo publikoi gjithashtu Behold the Monster: Facing America's Most Prolific Serial Killer, i bazuar në intervista me vrasësin serial Samuel Little, i cili pranoi se kishte kryer 93 vrasje midis viteve 1970 dhe 2005.
Ajo u martua me Scott Shriner në vitin 2005, dy vjet përpara se ai të bashkohej me grupin Weezer, grupi amerikan i njohur për hitet alternative si Buddy Holly dhe Hash Pipe.
Më herët këtë javë, grupi u konfirmua së bashku me Ed Sheeran si shtesa të fundit në listën e performuesve të festivalit muzikor Coachella në Kaliforni, që fillon të premten. Nuk dihet ende nëse arrestimi i Lauren do të ndikojë në pjesëmarrjen e grupit në festival
