Edhe pse shquhet si një prej të famshmeve më të bukura dhe më në trend me modën, Blake Lively, së fundmi ka folur hapur për trupin e saj pas lindjes së fëmijës së tretë me aktorin, Ryan Reynolds.
Ylli i serisë “Gossip Girl” ka treguar se pas sjelljes në jetë të vajzës së tretë, kishte përjetuar pasiguri rreth figurës së saj pasi është detyruar ta ndërrojë tërësisht gardërobën.
Ajo e postoi një fotografi në Instagram nga paraqitja e saj në emisionin “The Tonight Show Starring Jimmy Fallon”, në janar të vitit 2020, të shoqëruar me mbishkrimin: “E pata kombinuar një bluzë të markës “Lanvin” dhe një fustan të disenjatores Neta Porter, për ta krijuar këtë veshje, sepse askush nuk mund të më siguronte rroba të cilat i përshtateshin trupit tim pas lindjes. Nuk është mesazh i mirë për gratë kur rrobat e markave të njohura, nuk janë të përshtatshme për trupin e tyre. Në fakt kjo i bënë konfuze,” tha Lively e cila tutje deklaroi se atëkohë nuk ndihej krenare me trupin e saj të ri, që kishte ndryshuar aq shumë gjatë shtatzënisë. “Do të dëshiroja shumë të isha ndier më e sigurt për trupin tim atëherë, sikurse ndihem tani. Ai trup ma dhuroi një fëmijë. Ai trup prodhonte ushqimin e foshnjës së vogël. Çfarë mrekullie e bukur. Dhe në vend se të isha krenare, unë ndihesha e pasigurt. Thjeshtë ngase rrobat nuk më përshtateshin për trupi. Çfarë paragjykimi i gabuar dhe qesharak.”
Mesazhin e saj pozitiv, aktorja e përfundoi duke e lavdëruar personat si blogerja Katie Sturino, që po i sfidon markat e njohura të modës të përmirësohen dhe të krijojnë më shumë koleksione për gratë me përmasa më të mëdha trupore, si dhe po i ndihmon gratë anembanë botës të mos ndihen të vetme në këtë sfidë.
Deklarata e aktores u mirëprit nga një numër i madh i personaliteteve të famshme, veçanërisht ato që janë vet nëna, të cilat e shpërndanë mesazhin e saj në rrjetet sociale duke e përgëzuar për guximin për ta treguar të vërtetën.
Blake Lively dhe Ryan Reynolds njihen si një prej çifteve më të dashura të showbizit. Përveç se e gëzojnë një karrierë të suksesshme në film, ata gjithashtu shquhen për angazhimet e tyre të mëdha në fushën e bamirësisë.
