Aktori dhe komediani britanik Russell Brand, 50 vjeç, është liruar me kusht pas paraqitjes në Gjykatën e Magjistraturës në Westminster, më 19 janar, lidhur me dy akuza të reja penale seksuale, përfshirë një për përdhunim.
Brand u paraqit përmes një lidhjeje video nga SHBA-ja dhe konfirmoi vetëm emrin dhe datën e lindjes.
Ai tashmë ka mohuar dy akuza të mëparshme për përdhunim, një akuzë për sulm të pahijshëm dhe dy akuza për sulm seksual, që lidhen me veprime të dyshuara ndërmjet 1999 dhe 2005 ndaj katër grave.
Akuzat e reja lidhen me një rast të dyshuar për përdhunim dhe sulm seksual në Londër në vitin 2009. Russell Brand do të paraqitet sërish në Gjykatën e Kurorës në Southwark më 17 shkurt.
Gjithashtu, gjyqi për pesë akuzat origjinale pritet të fillojë më vonë gjatë vitit në të njëjtën gjykatë.
Hetimet për akuzat kundër Brand filluan pas raportimeve të publikuara nga ‘Sunday Times’, ‘The Times’ dhe një transmetim i Channel 4 në shtator 2023.
