Duket sikur ka pushuar për tre muaj, por në fakt ai ka punuar dhe menduar mirë, sepse gjithmonë sjell diçka të veçantë, kur bëhet fjalë nga muzika e deri te detajet e look-ut të tij.
E kemi fjalën për artistin David Dreshaj, ndjekësit e shumtë të të cilit e kanë mirëpritur lajmin që vetë ai ka publikuar përmes një sekuence videosh se projekti i tij muzikor është gati. Kënga do të quhet “Brenga”, me muzikë dhe produksion nga Cricket (Donat Prelvukaj), melodi nga Elinel, Granit Ismajli dhe Cricket, ku ky i fundit ka realizuar edhe beat-in.
Teksti është shkruar nga Elinel, Granit Ismajli dhe Cricket, i regjistruar dhe masterizuar në Cricket Music, ndërsa videoja e veçantë është realizuar nga Mars Studio (Endrit Rrahimi).
Natyrisht, Davidi do të vijë unik në stilin e tij, për të cilin mendon vetë së bashku me disa bashkëpunëtorë të zakonshëm. Mësojmë gjithashtu se djaloshi i njohur i muzikës ka xhiruar në të ftohtin acar dhe disa herë është dashur të ngrohet e të mbulohet me batanije.
Por nga gjithë ky mund dhe muajt e pritjes, një gjë është e sigurt: ai do të na ngrohë me zërin e tij në projektin e tij më të ri që po vjen.
