Jada Pinkett Smith ka reaguar ashpër ndaj pretendimeve që i cilëson si “të pakuptimta”, pasi muzikanti Bilaal Salaam ngriti një padi prej 3 milionë dollarësh kundër saj, duke e akuzuar se e ka kërcënuar gjatë një feste ditëlindjeje pesë vite më parë.
Moderatorja e “Red Table Talk” ka depozituar një kërkesë në gjykatë për rrëzimin e padisë, duke argumentuar se akuzat e Salaam janë “të rreme, të pakonfirmuara dhe të bëra për të tërhequr vëmendje, si pjesë e një fushate të vazhdueshme ngacmimi publik” ndaj saj dhe familjes Smith.
Sipas dokumenteve gjyqësore, Pinkett Smith pretendon se padia synon ta ndëshkojë për “fjalën e saj të mbrojtur me Kushtetutë mbi një çështje me interes të madh publik që lidhet me familjen e saj”.
Ajo gjithashtu e akuzon Salaam për një “fiksim” ndaj familjes Smith dhe thekson se nuk e ka përmendur asnjëherë me emër atë gjatë incidentit të pretenduar në shtator 2021.
Salaam, i cili e ka quajtur veten “miku më i mirë i Will Smith për gati 40 vite”, pretendon se Pinkett Smith e ka përballur në festën e ditëlindjes së aktorit më 25 shtator 2021, në Regency Calabasas Common.
Sipas padisë, aktorja e filmit The Matrix dyshohet t’i ketë thënë se do të “zhdukej ose do të merrte një plumb” nëse vazhdonte të fliste për çështje personale të saj.
Në dokumente thuhet gjithashtu se Pinkett Smith ka nisur një “fushatë hakmarrëse” kundër tij, pasi ai refuzoi të ndihmonte në menaxhimin e krizës pas incidentit të famshëm në ceremoninë e Academy Awards 2022, ku Will Smith goditi me shuplakë komedianin Chris Rock në skenë.
Salaam po ashtu e padit Pinkett Smith për “shkaktim të qëllimshëm të stresit emocional”, duke pretenduar se reputacioni i tij është shkatërruar, shëndeti i është përkeqësuar dhe ka pësuar humbje financiare si pasojë e sjelljes së saj të dyshuar “dashakeqe dhe të pamatur”.Kjo nuk është hera e parë që Salaam bën akuza tronditëse ndaj aktorit. Në nëntor 2023, përfaqësuesi i Will Smith mohoi kategorikisht pretendimin e tij se e kishte parë aktorin në një marrëdhënie intime me aktorin Duane Martin, duke e cilësuar historinë si “plotësisht të fabrikuar dhe tërësisht të pavërtetë”
