Ylli britanik i rock-ut, Morrissey, nuk do të mbajë koncertin në Valensia pasi festimet spanjolle ia penguan gjumin, njoftoi ai të enjten.
Në faqen e tij zyrtare u tha se “koncerti i planifikuar është i pamundur për shkak të mungesës së gjumit”.
Morrissey mbërriti të mërkurën nga Milano, por u shqetësua gjatë natës nga “këngët techno të larta dhe njoftimet me megafon” që dëgjoheshin nga dhoma e hotelit.
“Ka mbetur në gjendje katatonike”, thuhet në deklaratë, që shton se “koncerti nuk është anuluar, por rrethanat e bëjnë të pamundur mbajtjen e tij”.
Morrissey e përshkroi hotelin e tij si një “ferr të papërshkrueshëm” dhe tha se do t’i duhet “një vit për t’u rikuperuar”.
66-vjeçari po promovon albumin e ri “Make-up Is a Lie,” i pari pas gjashtë vjetësh, dhe është i njohur për hitet “How Soon Is Now?” dhe “Everyday Is Like Sunday,” si dhe për qëndrimet e tij të paparashikueshme, përfshirë kritikën ndaj luftës tradicionale me demat në Spanjë.
Festivali “Las Fallas” në Valensia, i njohur për fishekzjarrët dhe festimet e zhurmshme rrugore, kulmon me djegien e skulpturave të mëdha prej ‘papier-mâché’ më 19 mars.
UNESCO e ka përfshirë në trashëgiminë kulturore jo-materiale në 2016, duke e përshkruar si “pastrim dhe rinovim social”.
