Kaosi dhe trazirat që ndodhën në Capitol Hill të mërkurën nuk kishin lidhje me demokracinë, përkundrazi, ishin një sulm ndaj demokracisë.
Kështu është shprehur David L. Phillips, drejtor i Programit për Ndërtimin e Paqes dhe të Drejtave në Institutin për Studimin e të Drejtave të Njeriut në Universitetin e Columbia-s, SHBA, në një bisedë me Jonida Shehun.
Phillips, i cili ka qenë edhe këshilltar i ish-presidentëve Clinton, Bush dhe Obama, u shpreh për “Radari Informativ” në ABC se ajo që ndodhi dje në SHBA ishte e pritshme, duke marrë parasysh qëndrimin e mbajtur nga Trump për rezultatin e zgjedhjeve të nëntorit.
“Po në fakt unë po flisja me njerëz ditën e djeshme dhe po diskutoja për diçka të tillë, pasi Trump thoshte herë pas here se kishte manipulim të zgjedhjeve.”
Po ashtu, sipas David Phillips, fjalët e presidentit Donald Trump ishin ato që e ngritën publikun për të sulmuar Kongresin.
“U mblodh një turmë që iu sul Kongresit. Ishin fjalët e tij nxitëse që ngritën publikun. Sa më shpejt që të largohet Trump, aq më mirë do të jetë për Amerikën. Këto që ndodhën e kanë cënuar imazhin e SHBA-ve që shiheshin si një vend i artë, i lirive dhe demokracive. Këto vite të kaluara, në presidencën e Trump, kanë qenë vite të errëta. Amerika nuk ka pasur nivelin e duhur të demokracisë. Georgia zgjodhi dy përfaqësues demokratë, për vitet e ardhshme do kemi mundësinë të bëjmë korrigjime.”
Ndërsa, i pyetur cila është më shqetësuese protesta apo qëndrimi i Donald Trump, Phillips tha: “Amendamenti jonë i parë garanton të drejtën e fjalës, ajo që ka qenë më shqetësuese, ka qenë përpjekja e vazhdueshme për të ulur nivelin e demokracisë, për të marrë ekstremistë në krahun e tij. Personat që kanë ushtruar dhunë, duhet të burgosen.”
Twitter, Facebook dhe Instagram bllokuan llogaritë e Trump pas trazirave në Kapitol dhe kjo për David L. Phillips është një gjë e mirë, pasi sipas tij, liria e fjalës mund të ushtrohet për sa kohë nuk është e dhunshme.
Sipas tij, ajo e djeshmja nuk ishte protestë politike, por një akt terrorizmi të brendshëm që u organizua nga Trump.
Por çfarë drejtimi do të mbajë administrata Biden sa i përket politikës dhe marrëdhënieve në rajonin tonë ku aktualisht janë disa çështje të “nxehta” si kufiri detar me Greqinë, marrëdhëniet me Turqinë, si dhe dialogu Kosovë-Serbi?
David L. Phillips: “Çështjet e detit duhet të studiohen. SHBA duhet të jetë më aktive në ndërmjetësim. ka një ndryshim të madh mes qasjes së Biden, ai do të jetë i përkushtuar dhe në dialogun Kosovë-Serbi. Kemi nevojë për bashkëpunim mes SHBA dhe BE. Duhet të rregullojmë komunikimin mes këtyre vendeve, përfshirë edhe Shqipërinë. Duhet të punojmë më fort së bashku.”
