Yuri Kim sulmon Tom Doshin: Nuk ka rëndësi nëse paguan faturën e spitalit për ju, ai s’e meriton t’ju përfaqësojë

Shqipëria

Yuri Kim sulmon Tom Doshin: Nuk ka rëndësi nëse paguan faturën e spitalit për ju, ai s’e meriton t’ju përfaqësojë

Më: 13 prill 2021 Në ora: 23:12
Yuri Kim

Ambasadorja Yuri Kim ka sulmuar kandidatin për deputet të Partisë Social Demokrate, Tom Doshi. E ftuar në emisionin “Përballë”, Kim pa përmendur emra tha se shqiptarët nuk duhet që të votonin personat që i paguanin faturat e spitalit qytetarëve, ndërsa shtoi se veprat e mira jo domosdoshmërisht nënkuptojnë se s’kemi të bëjmë me kriminelë. 

“Mendoj se votuesit shqiptarë janë të mençur, e dinë se kush bën çfarë. Ne u kemi treguar se kush nuk duhet të jetë në parlament. Ky person është dikush që i ndalohet në SHBA, në të gjithë vendin dhe kjo ka më shumë peshë se çdo faturë dyqanesh apo spitali që ka paguar. Fakti që vjen në dasmën e vajzës tënde, nuk do të thotë që është njeri i mirë. I quaj kriminelë sepse përpjekja për të blerë votën është krim,”-tha ajo.

Por pse Kim nënkupton Tom Doshin?

Vetëm pak javë më parë, kandidatja për deputete me PSD-në, Senera Hoxha u shpreh se shkak për të hyrë në politikë ishte bërë humanizmi që ajo kishte pikasur nga kryetari i partisë, Tom Doshi. Sipas saj, ai paguante faturat e spitaleve të qytetarëve dhe ky gjest e kishte prekur.

Kim gjithashtu thotë se organet e drejtësisë në Shqipëri, përfshirë dhe SPAK, kanë në dispozicion informacion mbi listën e zezë që i ndalon hyrjen në SHBA tre ish zyrtarëve shqiptarë nën akuzën e korrupsionit. Kim shton se “institucionet ligjzbatuese nuk kanë kurajo të veprojnë me këto raste.”

“Ajo që mungon është – të jem e ndershme – ajo që mungon është kurajo. Dhe mendoj se kemi pasur raste kur është treguar kurajo. Mendoj se duhet të shohim më shumë. Kam besim që investimi i Amerikës tek reforma në drejtësi, tek SPAK, do t’ia vlejë por ky është një moment i vështirë. Siç e them shpesh, reforma në drejtësi nuk është e shpejtë, e lehtë, apo e përsosur por po fillojmë të shohim rezultate. SPAK ka nxjerrë raportin e parë vjetor dhe deri tani kanë raportuar se kanë bërë 588 ndjekje penale, kanë konfiskuar pasuri me vlerë 70 milionë euro. Kanë hetuar 746 individë. Kanë dërguar shumë prej tyre në gjykatë dhe 114 janë dënuar deri më sot.”- tha ambasadorja Kim.

Në harkun kohor të një viti, DASH u ka ndaluar hyrjen në SHBA tre ish zyrtarëve shqiptarë me të njëjtin motiv, përfshirjen në akte korrupsioni të rëndësishëm. Në vendimin e DASH, thuhej se “Sekretari i Shtetit kur ka informacion të besueshëm se zyrtarët e huaj kanë qenë të përfshirë në korrupsion të konsiderueshëm ose shkelje të mëdha të të drejtave të njeriut, atij individi dhe familjarëve të afërt të tij, u ndalohet hyrja në Shtetet e Bashkuara të Amerikës.

Shfaq komentet
comments powered by Disqus
Sot mund të lexoni Shfletoni kopertinat