Shqipëri, presidenti i ri mbetet pa emër - drejt ezaurimit pa kandidatë edhe raundi i dytë

Shqipëria

Shqipëri, presidenti i ri mbetet pa emër - drejt ezaurimit pa kandidatë edhe raundi i dytë

Më: 22 maj 2022 Në ora: 16:19
Foto ilustrim

Edhe raundi i dytë i votimit në seancë plenare për Presidentin e ri të Republikës, duket se do të ezaurohet pa kandidatë.

Në përfundim të orarit të përcaktuar nga konferenca e kryetarëve, ora 16:00, asnjë emër nuk është dorëzuar nga palët.

Seanca plenare është parashikuar për t’u mbajtur pasditen e së hënës në 18:00.

Ndonëse në mes javë palët u dakorduan për t’i lënë opozitës te drejtën për të propozuar e para kandidatin, marrëveshja nuk shkoi si duhet, pasi kreu i grupit parlamentar të PD Enkelejd Alibeaj, akuzoi socialistët për prishje të saj.

Kujtojmë se raundi i parë për zgjedhjen e presidentit u ezaurua më 16 maj pa kandidatë zyrtarë, pasi grupet parlamentare në Kuvendin e Shqipërisë nuk dorëzuan kandidatura.

Sipas Kushtetutës së Shqipërisë, kandidati për president i propozohet Kuvendit nga një grup prej jo më pak se 20 deputetësh.

Për zgjedhjen e presidentit të vendit, Kuvendi zhvillon deri në pesë votime (raunde). Presidenti zgjidhet në votimin e parë, të dytë ose të tretë kur një kandidat merr jo më pak se tri të pestat e votave (84 vota) të të gjithë anëtarëve të Kuvendit, ndërsa Kuvendi i Shqipërisë ka 140 deputetë.

Në votimin e katërt dhe të pestë zgjidhet president kandidati që siguron më shumë se gjysmën e votave të të gjithë anëtarëve të Kuvendit. Votimi i pestë zhvillohet kur në votimin e katërt asnjë kandidat nuk ka siguruar shumicën e kërkuar të votave.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat