Shuhen vatrat e zjarrit në Shetaj të Durrësit, mbetet aktive vetëm një ku ndërhyrja është e pamundur

Shqipëria

Shuhen vatrat e zjarrit në Shetaj të Durrësit, mbetet aktive vetëm një ku ndërhyrja është e pamundur

Më: 10 gusht 2022 Në ora: 21:05
Foto ilustrim

Shuhen vatrat e zjarrit në Shetaj të Durrësit, aktive ka mbetur vetëm një vatër në greminë ku ndërhyrja nga toka është e pamundur.

Lajmi bëhet i ditur nga sektori i përballimit të emergjencave civile në prefekturën e Durrësit.

”Operacioni i ndërhyrjes nga toka ka përfunduar dhe aktualisht forcat janë duke dalë nga terreni i vështirë.”

Që në orët e para të mëngjesit ka nisur ndërhyrja nga toka në vatrat e fshatit Shetaj. Përgjatë gjithë ditës së mërkurë është punuar me intensitet të lartë nga forcat në terren të ndarë në 3 grupe me nga 10 efektivë për grup.

Nga ana e drejtuesve të operacionit u vendos të provohej të futeshin 2 mjete zjarrfikëse tek rruga e hapur nga fadromat gjatë javës së kaluar, aq sa do të ishte e mundur pa rrezikur një tjetër aksident, si ai i 5 gushtit me mjetin zjarrfikës të Autoritetit Portual. Nga afrimi i mjetit zjarrfikës është bërë e mundur shtrirja e një tubi rreth 350 metra për fikjen e një pjese të vatrave të riaktivizuara, disa prej të cilave një ditë më parë.

Aktive nderkohë është vetëm vatra në fund të greminës ku është e pamundur ndërhyrja nga toka.

Në operacionin e ndërhyrjes gjatë ditës së sotme morën pjesë 15 efektivë dhe 2 mjete zjarrfikëse të Durrësit, si dhe 2 mjete dhe 12 efektivë të Forcave të Armatosura.

Situata do të monitorohet në vazhdim nga stacioni provizor i zjarrfikësve në Gjirin e Lalzit.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat