Drejtori i Përgjithshëm i Policisë, Ilir Proda mëngjesin e kësaj të marte është fotografuar duke u futur në ambientet e GJKKO-së.
Proda është paraqitur lidhur me masat e sigurisë të kërkuara për gjykatat pas vrasjes së gjyqtarit Astrit Kalaja në sallën e gjyqit javën e kaluar.
Proda pritet që gjatë këtij takimi të diskutojë me drejtues të GJKKO-së dhe përfaqësues të institucioneve ligjzbatuese për mënyrat e garantimit të rendit dhe sigurisë gjatë zhvillimit të proceseve gjyqësore.
Gjyqtari i Apelit, Astrit Kalaja u qëllua për vdekje në sallën e gjyqit pasi shpalli një vendim për një konflikt pronësie, në një ngjarje të paprecedentë që u shoqërua me tronditje dhe shqetësime për sigurinë e sistemit gjyqësor.
