Dhunuan 18-vjeçarin në Konispol, pas arrestimit procedohen penalisht 3 autorët

Shqipëria

Dhunuan 18-vjeçarin në Konispol, pas arrestimit procedohen penalisht 3 autorët

Më: 21 nëntor 2025 Në ora: 10:56
Foto ilustrim

Tre të rinj janë vënë në pranga nga policia në Konispol. Arrestimi i tyre erdhi pasi ishin shpallur në kërkim lidhur me dhunimin me sende të forta të një 18-vjeçari.

Policia njoftoi se të rinjtë janë lënë të lirë pas arrestimit dhe janë proceduar penalisht për veprat penale “Plagosje e lehtë me dashje” dhe “Shkatërrimi i pronës”. Lidhur me ngjarjen është në kërkim edhe një person tjetër.

“Specialistët për Hetimin e Krimeve në Stacionin e Policisë Konispol, në vijim të ngjarjes së ndodhur më datë 13.11.2025, në Konispol, ku u godit me mjete të forta dhe u dëmtua shtetasi E. K., 18 vjeç, si dhe automjeti i tij, kapën shtetasit e shpallur në kërkim F. A., 18 vjeç, O. L., 19 vjeç, si edhe një shtetas të mitur 17 vjeç.

Pas konsultimit me Prokurorin e rastit, këta shtetas do të hetohen penalisht në gjendje të lirë për veprat penale “Plagosje e lehtë me dashje” dhe “Shkatërrimi i pronës”, të kryera në bashkëpunim. Vijon puna edhe për kapjen dhe vënien para përgjegjësisë ligjore të shtetasit N. D. Materialet iu referuan Prokurorisë, për veprime të mëtejshme”, njofton policia.

comment Për komente lëvizni më poshtë
Sot mund të lexoni Shfletoni kopertinat