Ministri për Evropën dhe Punët e Jashtme i Shqipërisë, Ferit Hoxha, ka shprehur solidaritetin e plotë të Shqipërisë me Holandën dhe Austrinë pas sulmeve të fundit ruse ndaj Kievit, të cilat shkaktuan dëme edhe në objektet e tyre diplomatike.
Përmes një postimi në platformën X, Hoxha ka dënuar sulmet, duke theksuar se ato nuk janë incidente të izoluara, por pjesë e një serie goditjesh që kanë vënë në rrezik misionet diplomatike dhe personelin e tyre në kryeqytetin ukrainas.
Ai ka bërë të ditur se edhe prania diplomatike e Shqipërisë në Kiev është përballur me rreziqet e sulmeve të tilla.
“Misionet diplomatike dhe personeli i tyre gëzojnë mbrojtje sipas së drejtës ndërkombëtare. Siguria e tyre duhet të respektohet në çdo rrethanë. Çdo sulm që i vë ata në rrezik është i papranueshëm, duhet të dënohet pa asnjë ekuivok dhe autorët duhet të mbajnë përgjegjësi”, ka shkruar Hoxha.
Kryediplomati shqiptar ka vlerësuar se këto goditje dëshmojnë karakterin e pakursyer të luftës së agresionit që Rusia po vazhdon kundër Ukrainës, si dhe shpërfilljen e së drejtës ndërkombëtare.
Në reagimin e tij, Hoxha ka bërë thirrje për unitet dhe vendosmëri në mbështetje të Ukrainës, në mbrojtje të së drejtës ndërkombëtare dhe kundër agresionit rus.