Drejtori i Përgjithshëm i Policisë së Shtetit, Skënder Hita, deklaroi se siguria mbetet “pasaporta” kryesore për miliona turistë dhe vizitorë që zgjedhin Shqipërinë, gjatë fjalës së tij në Samitin e Diasporës, në panelin për migracionin dhe politikat e riatdhesimit.
Në fjalën e tij, Hita theksoi se Policia e Shtetit ka hyrë në një fazë të re modernizimi dhe transformimi, me synimin për të qenë një institucion më profesional, transparent dhe i besueshëm për qytetarët, brenda dhe jashtë vendit.
Sipas tij, investimet në teknologji, rritja e kapaciteteve njerëzore dhe bashkëpunimi me partnerët ndërkombëtarë janë shtyllat kryesore të këtij transformimi.
Hita nënvizoi gjithashtu rëndësinë e Policisë së Shtetit si kontakti i parë për turistët dhe vizitorët që hyjnë në Shqipëri, duke theksuar përmirësimet në pikat kufitare, pajisjen me teknologji bashkëkohore dhe trajnimet e vazhdueshme të punonjësve.