Lëvizja Vetëvendosje duket se do të përmbysë rezultatin e votave të fituara në zgjedhjet e 6 tetorit kur doli parti fituese.
Nga 37.52 për qind të votave të numëruara nga KQZ-ja deri më tash nga 2.382 qendra votimi, partia e Albin Kurtit ka marrë 137.039 vota ose 47.56 për qind. Në vendin e dytë renditet Partia Demokratike e Kosovës me 53.766 vota ose 18.66 për qind.
LDK e Isa Mustafës ka marrë 39.731 vota ose 13.79 për qind. AAK, partia e Ramush Haradinajt që kandidon për president, ka marrë 25.081 vota ose 8.70 për qind. Nisma e Fatmir Limajt deri më tash ka marrë 7.757 vota ose 2.69 për qind që e lë nën pragun 5 për qind.
Lëvizja Vetëvendosje me në krye Albin Kurtin më 6 tetor 2019 mori 221.001 vota ose 26.27 për qind, duke lënë pas LDK-në me 206.516 vota ose 24.54 për qind të votave.
Vetëvendosje në vitin 2017 kishte arritur të sigurojë 200.135 vota ose 27.49 për qind të votave ndërsa koalicioni LDK-AKR-Alternativa 185.884 vota ose 25.53 për qind. LVV në zgjedhjet e vitit 2014 kishte arritur të sigurojë vetëm 13.59 për qind apo 99 mijë e 298 vota, ndërsa LDK 25.24 për qind apo 184.594 vota.
Ajo që bie në sy është se Lëvizja Vetëvendosje nuk u dëmtua nga ndarja që pësoi nga një pjesë e saj, PSD-ja, duke qëndruar në një rezultat të mirë në tri palë zgjedhjet e fundit.
Në anën tjetër, PDK-AAK-Nisma që në zgjedhjet e 11 qershorit 2017 dolën fituese si koalicioni PAN me 33.74 për qind të votave, në vitin 2019 shënuan rënie.
PDK në zgjedhjet 2019 u rendit e treta, me 178 mijë e 637 vota ose 21.23 për qind, ndërsa më 2014 mori 30.38 për qind ose 222.181 vota. Ndërsa AAK e cila në zgjedhjet 2019 në garë në koalicion me PSD, së bashku morën 96.872 vota ose 11.51 për qind të votave, në vitin 2014 kur edhe garoi e vetme, AAK kishte arritur të sigurojë vetëm 9.54 për qind apo 69 mijë e 793 vota.
Ndërkaq, Nisma Socialdemokrate e cila në këto zgjedhje garoi si koalicion NISMA-AKR-PD kishte 5,002% për qind apo 42.083. Kjo e fundit më mirë ishte në zgjedhjet e vitit 2014, kur kishte siguruar 37 mijë e 680 vota apo 5.15 për qind.
Në anën tjetër, 6.72 për qind të votave ka siguruar Lista Serbe, duke shënuar rritje nga zgjedhjet e kaluara. LS, në zgjedhjet parlamentare të vitit 2017 pati siguruar 6.11 për qind të votave apo 44 mijë e 499 vota, duke tejkaluar rezultatin e zgjedhjeve të vitit 2014, kur kishte grumbulluar 5.22 për qind të votave.
