Shefi i Grupit Parlamentar të Aleancës për Ardhmërinë e Kosovës (AAK), Besnik Tahiri në mbledhjen e sotme të Komisionit për Legjislacion, Mandate dhe Imunitete ka kërkuar që rregullorja e Kuvendit të shtyhet përpara dhe të ketë një afat kohor në këtë proces.
Këtë e ka bërë të ditur vet Tahiri përmes një postimi në llogarinë e tij në Facebook.
“Në mbledhjen e sotme të Komisionit për Legjislacion, Mandate, Imunitete, Rregulloren e Kuvendit dhe mbikëqyrjen e Agjencisë kundër Korrupsionit, ndër të tjera kërkova që Rregullorja e Kuvendit të shtyhet përpara dhe procesi të ketë një afat kohor. Theksova se nuk ka logjikë që Kuvendi i Kosovës të mos mund ta ndryshojë që 9 vite rregulloren. Sugjerova që Rregulloja e Kuvendit të reflektojë kontekstin e Kosovës dhe argumentova se kjo rregullore duhet të lehtësojë punën e Kuvendit dhe jo të pengojë”, ka shkruar Tahiri.
Ai ka mirëpritur kontributin edhe të shoqërisë civile me ndihmë profesionale.
“Njëkohësisht, mirëprita angazhimim e shoqerisë civile, për kontributin e tyre me ndihmë profesionale”, ka përfunduar Tahiri.
