Reagon edhe Ramush Haradinaj/ Nuk e përmend me emër, por kështu i kundërpërgjigjet Donika Gërvallës

Aktuale

Reagon edhe Ramush Haradinaj/ Nuk e përmend me emër, por kështu i kundërpërgjigjet Donika Gërvallës

Nga: P.R Më: 10 maj 2021 Në ora: 19:53
Ramush Haradinaj

Deklaratat e dhëna kohë më parë lidhur me Gjykaten Speciale dhe ish komandantet gjatë luftës nga Donika Gërvalla, e cila tash është Ministre e Jashtme dhe Zëvendëskryeministre e Kosovës, janë bërë shkak i një fushate të egër sulmesh ndaj Donika Gërvallës, e cila është edhe bija e heroit të kombit, Jusuf Gërvalla. Madje PDK dhe eksponentë të afërt me Hashim Thaçin kanë kërkuar edhe dorëheqjen e Donika Gërvallës.

E i fundit që ka reaguar është edhe lideri i AAK-së, Ramush Haradinaj.

“Unë asnjëherë nuk do e lejoj veten që të polemizoj me pasardhësit e heronjëve, por, gjithmonë do e ndjek rrugën e tyre në shërbim ndaj Atdheut. Deri në frymën e fundit!”, ka shkruar ndër tjerash Haradinaj, përcjellë “Bota sot”.

Postimi i plotë:

Gjithmonë kam qenë mirënjohës dhe i përulur para veprës dhe sakrificës së atdhetarëve, veprimtarëve politikë, heronjëve e dëshmorëve të kombit, të të gjitha periudhave historike. Në këtë mënyrë jam edukuar si fëmijë dhe kjo edukatë më ka përcjellur tërë jetën time. Mbetem i vendosur në këtë rrugë, pavarësisht rrethanave që mund të na sjell e ardhmja.

Për interesin e kombit dhe shtetit, gjithmonë kam tejkaluar vetveten dhe kam kapërcyer kufijtë partiak. Ne kemi mjaft armiq që përpos se dëshirojnë ta tjetërsojnë të kaluarën tonë të lavdishme, provojnë edhe sot që të nxisin përçarjen e brendshme dhe të krijojnë opinione në të cilat demonizohen personalitetet e shquara historike, si pjesa politike ashtu edhe pjesa ushtarake. Në rastin e Luftës Çlirimtare, ne duhet të bëhemi bashkë, jo ta mbrojmë, sepse nuk ka nevojë për mbrojtje, por për ta prezantuar ashtu siç është: të pastër e vetmbrojtëse, ku në njërën anë ishin bijtë e bijat të rreshtuar në UÇK, që mbronin familjet e tyre, tokën e stërgjyshërve dhe të drejtën për të jetuar të lirë e me dinjitet; e në anën tjetër ishte agresori që erdhi nga një vend tjetër dhe tentoi që përmes gjenocidit ta zhbëjë qenien shqiptare nga trojet e veta.

Pasardhësit e personaliteteve të shquara, që kanë marrë pjesë apo edhe i kanë udhëhequr përpjekjet tona për çlirim, kanë kaluar në situata shumë të vështira jetësore. Mbetja pa prind në kohëra shumë të vështira, kur Kosova ishte ende e okupuar e kur Shqipëria ishte e pazonja për shkak të problemeve të shumta dhe krizave, ka qenë një sfidë e madhe, pasi që ka rezultuar me mungesën e përkujdesjes shtetërore dhe shoqërore për fëmijët e heronjëve. Andaj, jo për shkak të mosdedikimit të tyre për Atdheun, por për shkak të sfidave e pengesave jetësore, një numër i madh i tyre kanë qenë në pamundësi të dëshmohen gjithëherë në lartësinë që kishin prindërit e tyre.

Unë asnjëherë nuk do e lejoj veten që të polemizoj me pasardhësit e heronjëve, por, gjithmonë do e ndjek rrugën e tyre në shërbim ndaj Atdheut. Deri në frymën e fundit!

RH

commentFirst article
Sot mund të lexoni Shfletoni kopertinat