Vendimi i Apelit, reagon Meliza Haradinaj-Stublla

Aktuale

Vendimi i Apelit, reagon Meliza Haradinaj-Stublla

Më: 19 tetor 2021 Në ora: 11:50
Meliza Haradinaj-Stublla

Ish-Ministrja e Punëve të Jashtme, Meliza Haradinaj-Stublla, ka reaguar pasi Gjykata e Apelit e vërtetoi sot aktgjymin e Themelores për rastin e saj.

Përmes një postimi në llogarinë e saj në Facebook, Haradinaj-Stublla ka thënë se pas 3 viteve përballjeje me një çështje penale absurde, drejtësia triumfoi.

“Pavarësisht koincidencave që është vështirë të injorohen, e për të cilat nuk është momenti të flas sot, tani më shumë se çdo herë tjetër besoj në drejtësi. Janë pikërisht rastet si ky i imi që dëshmojnë më së miri pse duhet të luftojmë e të ndihmojmë secilin e secilën që përkushtohet t’a mbrojë gjyqësorin nga ndikimi politik, e mediat nga instrumentalizimi shantazhues! Gjuetia e shtrigave kundër atyre që NUK PËRSHTATEN duhet të marr fund! E kam thënë shpesh: disa beteja edhe mund t’i humbim rrugës, por luftën do ta fitojmë!”, ka shkruar Haradinaj-Stublla.

Ndryshe, Gjykata e Apelit ka njoftuar se është vërtetuar aktgjykimi i Gjykatës Themelore në Prishtinë në rastin e ish-ministres, Meliza Haradinaj-Stublla.

Sipas këtij aktgjykimi, Haradinaj-Stublla ishte liruar nga akuza, meqenëse nuk është vërtetuar se e njëjta e kryer veprën penale mos raportimi apo raportimi i rremë i pasurisë, i të ardhurave, i dhuratave, i dobisë tjetër materiale ose detyrimeve financiare, nga neni 437, paragrafi 2. KPRK.

“Ndaj aktgjykimit të lartcekur, ka paraqitur ankesë Prokuroria Themelore në Prishtinë, duke i propozuar kolegjit penal të Gjykatës së Apelit të Kosovës, që ankesa të aprovohet, ndërsa çështja penale t’i kthehet gjykatës së shkallës së parë në rigjykim.

Kolegji penal i Gjykatës së Apelit të Kosovës pas shqyrtimit të të gjitha shkresave të lëndës dhe vlerësimit të pretendimeve ankimore, ka konstatuar ankesa e Prokurorisë Themelore në Prishtinë është e pabazuar, pasi që aktgjykimi i lartcekur i Gjykatës së Themelore në Prishtinë, nuk është përfshirë në asnjë shkelje ligjore, për faktin se nga provat e administruara nuk është vërtetuar se e akuzuara M.H.S., ta ketë kryer veprën penale për të cilën ishte akuzuar, andaj edhe me të drejtë është liruar nga akuza”, thuhet në njoftim.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat