Arben Vitia në dhjetor mund të nis punë të re

Aktuale

Arben Vitia në dhjetor mund të nis punë të re

Më: 19 nëntor 2021 Në ora: 12:35
Arben Vitia

Arben Vitia e humbi garën për Prishtinën duke marrë mbi 1 600 vota më pak se kundërkandidati i tij nga Lidhja Demokratike e Kosovës, Përparim Rama.

Me 1 tetor, Arben Vitia dha dorëheqje nga pozita e Ministrit të Shëndetësisë i bindur në fitoren e tij në garën për kreun e Prishtinës.

“Unë sot po e përmbyllë këtë detyrë që ma besuan. Unë nga tani e tutje do të jem pjesë e një ekipi tjetër që ka në fokus kryeqytetin tonë”, kishte thënë Vitia duke prezantuar punën që e ka bërë gjatë kohës sa ka qenë ministër.

Vetëm dy ditë pas humbjes së Vitisë në balotazh, kryeministri Albin Kurti e solli në krye të Ministrisë së Shëndetësisë, kirurgun e njohur Dr.Rifat Latifi.

Po ditën e prezantimit të ministrit të ri të Shëndetësisë, Kurti foli pak edhe për Vitinë. Ai tha se nuk e sheh të nevojshme të vendoset shpejt se cili do të jetë pozicioni dhe angazhimi i ri e ish-ministrit të Shëndetësisë, Vitia.

“Se cilat do të jenë angazhimet e tij në të ardhmen, unë nuk mendoj se ka ndonjëfarë nxitimi që të vendosim tani. Kjo natyrisht bëhet varësisht prej planeve që i ka edhe vetë z.Vitia”, ka deklaruar Kurti.

Arben Vitia megjithatë nuk mund të mbetet krejt pa punë. Ai në dhjetor mund të betohet si asamblist i Kuvendit Komunal të Prishtinës pasi që ishte edhe bartës i listës së VV-së duke marrë 26 mijë e 988 vota. Nuk dihet nëse Vitia do të ulet në Kuvendin Komunal, apo do ta liroi vendin për dikë tjetër, por mundësinë aktualisht e ka.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat