Kush janë drejtorët e rinj të Komunës së Prishtinës dhe nga cilat parti vijnë?

Aktuale

Kush janë drejtorët e rinj të Komunës së Prishtinës dhe nga cilat parti vijnë?

Më: 19 janar 2022 Në ora: 20:38
Kryetari i Prishtinës Përparim Rama

Kryetari i Prishtinës Përparim Rama kishte premtuar se kabineti i tij qeverisës do të përbehet nga profesionistë nga të gjitha subjektet politike.

Nga 11 drejtorët e prezantuar, 6 prej tyre kanë lidhje direkte me LDK-në, 2 kanë pasur lidhje me qeverisjen e Shpend Ahmetit, një nga Lëvizja për Bashkim, derisa dy të tjerë vijnë nga shoqëria civile.

Arbër Sadiki – Drejtor i Urbanizmit.  Sadiki është arkitekt i njohur i cili ka bërë hulumtime për arkitekturën e ndërtesave ikonë të kryeqytetit e me pas ka botuar libër.

Mimoza Sylejmani – Drejtoreshë e Planifikimit Strategjik dhe Zhvillimit të Qëndrueshëm. Sylejmani për disa vite ka punuar në zyrën për rigjenerim urban në komunë si dhe në mandatin e kaluar ka qenë këshilltare komunale nga radhët e LVV-së e më pas PSD-së, në Kuvendin Komunal të Prishtinës.

Krenar Xhaferi – Drejtor i Investimeve Kapitale dhe Menaxhimit të Kontratave. Xhaferi është zgjedhur asambleist i LDK-së në Prishtinë në zgjedhjet e fundit lokale.

Doruntinë Maloku – Drejtoreshë e Pronave. Maloku ka qenë ish-deputete e LDK-së në Kuvendin e Kosovës.

Donat Lushaku – Drejtor i Kadastrit. Lushaku është zgjedhur asambleist i LDK-së në Prishtinë në zgjedhjet e fundit lokale.

Adelina Sahiti – Drejtoreshë e Mirëqenies Sociale. Sahiti ka qenë Kandidate e Lëvizjes për Bashkim për Kuvendin Komunal të Prishtinës në zgjedhjet e fundit lokale.

Izet Sadiku – Drejtor i Shëndetësisë. Infektologu Sadiku është zgjedhur asambleist i LDK-së në Prishtinë në zgjedhjet e fundit lokale. Ka ushtruar fuksione të ndryshme në QKUK përfshirë pozitën e U.D. drejtorit të Klinikës Infektive në kohë pandemie.

Valbona Makolli – Drejtoreshë e Financave. Makolli do të vazhdojë edhe një mandat në krye të Drejtorisë së Financave në Komunën e Prishtinës.

Makolli u emërua Drejtoreshë e Financave gjatë mandatit të ish-kryetarit Shpend Ahmeti, dhe e mban këtë pozitë që nga viti 2018.

Florian Dushi – Drejtor i Inspeksionit. Dushi ka mbajtur pozita të rëndësishme në ekzekutiv. Ka qenë zëvendësministër i Drejtësisë. Së fundmi ka mbajtur pozitën e anëtarit të LDK-së në KQZ.

Donika Çetta – Drejtoreshë e Parqeve. Donika është vajza e akademikut dhe pajtuesit të gjaqeve, Anton Çetta.

Bersant Beka – Drejtor i Administratës. Këshilltar i Ministrit të Shëndetësisë, Armend Zemaj dhe këshilltar i Përparim Ramës në garën për të parin e Prishtinës.

Deri më tani LDK në Prishtinë ende nuk ka zyrtarizuar koalicionin me PDK dhe subjektet tjera politike, që formalisht ishte arritur para votimit të kryesuesit të Kuvendit Komunal.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat