Masat që iu vendosën Kosovës nga BE-ja pas situatës së vitit të kaluar në veri, duket se do të marrin kahje jo të dëshirueshme për vendin, pikërisht për shkak të një aksioni tjetër.
Veprimet e Qeverisë së Kosovës dhe institucioneve të sigurisë në veri të vendit ku para më shumë se 10 ditësh mbyllen pikat ilegale të bankave serbe duket se do të përfshihet në raportin e kryediplomatit të BE-së, Josep Borrell për heqjen apo jo të masave ndaj Kosovës.
Raporti ende është duke u finalizuar dhe sipas zëdhënësit të Bashkimit Evropian, Peter Stano, i njëjti rrjedhimisht nuk u është dërguar as shteteve anëtare.
“Masat janë vendosur si përgjigje e hapave të pakoordinuara e të njëanshëm që dërgojnë drejt eskalimit të mëtejmë, dhe nuk ndihmojnë në deeskalim. Ato ishin vendosur me qëllimin që të motivojnë autoritetet kosovare që të punojnë drejt deeskalimit, kështu që sigurisht gjithçka që po ndodh në terren dhe ka ndikim negativ në përpjekjet për deeskalim, po merret parasysh dhe përfshihet në raport”, ka deklaruar Stano.
Ndërkohë për këto qeveria e Kosovës në një përgjigje për Dukagjinin vetëm ka ripërsëritur qëndrimin se masat kundër Kosovës duhet të hiqen sa më parë.
“Qeveria ripërsërit nga ana e saj në vazhdimësi që Kosova i ka përmbushur kushtet dhe masat duhet të hiqen sa më parë”, thuhet në përgjigjen e Klisman Kadiut, Këshilltar për media i zëvendëskryeministrit, Besnik Bislimi.
Abit Hoxha, që ligjëron në Universitetin e Adgerit në Norvegji, thotë se institucionet kosovare nuk po shohin në aspektin afatgjatë, duke ndikuar në këtë formë indirekt në atë çka realisht kërkon Serbia.
"Kjo është prej çështjeve tjera që Kosova në fakt nuk po mendon shumë. Njerëzit të cilët kanë përcjell Kosovën nga viti ’99 janë hequr nga pozicionet e tyre në BE, dhe gjeneratat sa më reja që vijnë ne BE, Kosova aq më vështirë do ta ketë argumentimin për favorin e saj. Zaten kjo është edhe qëllimi i politikave serbe, të cilat kanë qëllim vetëm shtyrjen e vendimeve për Kosovën”, ka deklaruar Hoxha.
Këshilli i Ministrave të Jashtëm të vendeve anëtare në bllokun evropian nuk pritet që të mbaj mbledhje për asnjë çështje, kjo për faktin që nga mesi i javës që vjen BE-ja hynë në proces zgjedhor.
