Dështon edhe përpjekja e 36-të e konstituimit të Kuvendit të Kosovës
Për herë të 36-të sot ka dështuar përpjekja për konstituimin e Kuvendit të Republikës së Kosovës.
Kryesuesi i seancës, Avni Dehari, kërkoi sërish sot nga subjektet politike parlamentare të cilat nuk i kanë propozuar emrat për anëtarë të komisionit zgjedhor për zgjedhjen e kryetarit të Kuvendit që ta bëjnë këtë, por propozime nuk pati.
Nga deputetët që ishin në sallë, 53 votuan për, një votë kundër e asnjë abstenim.
Seanca tjetër mbahet me 25 qershor në ora 11:00.
Berisha: Duhet të lejohet debati parlamentar në seancën konstituive
Deputeti i Aleancës për Ardhmërinë e Kosovës(AAK), Bekë Berisha ka kërkuar lejimin e debatit në seancën konstituive të Kuvendit të Kosovës.
Duke hyrë në objektin e Kuvendit për përpjekjen e 36-të të konstituimit të legjislaturës së nëntë, Berisha tha se i ka humbur kuptimi vazhdimit të seancës pa arritur një zgjidhje.
Ai tha se duhet të shkelet rregullorja e Kuvendit dhe të mundësohet debati gjatë seancës konstituive dhe të bëhen përpjekje për gjetjen e një rrugëdalje nga kriza politike.
Berisha: Duhet të lejohet debati parlamentar në seancën konstituive
“Ka humbur kuptimi gjithçka. Ne jemi mbetur peng dhe po thirremi në ligj. Këtyre po iu themi po e shkelni Kushtetutën dhe jemi mbetur peng i një rregulli që nuk bën me marrë fjalën. Në parlamentarizëm duhet me fol dhe zgjidh problemet. Duhet me bërë përpjekje me prish një rregull dhe me nisë me komuniku. Forma si jemi ne se 35 herë se kush është për dhe me shku e me ardh pas 48 orëve me të vërtet i ka humbur kuptimi. Ndoshta pasi të provojnë me mirëkuptim prej të gjitha partive politike me u mbledh dhe me këqyrë sesi me pas rrugëdalje ndoshta edhe t’u e shkel një rregull”, tha ai.
Kuvendi i Kosovës edhe pesë muaj pas zgjedhjeve parlamentare të 9 shkurtit nuk po arrin të konstituohet.
----
Deputetët do të tentojnë për herë të 36-të, sot në orën 11:00 të konstituojnë Kuvendin e Kosovës.
Të shtunën vazhdoi seanca konstituive e Legjislaturës së Nëntë të Kuvendit të Republikës së Kosovës, nën drejtimin e deputetit Avni Dehari.
Kryesuesi Avni Dehari përsëriti kërkesën për subjektet politike që nuk i kanë propozuar deputetët për anëtarë të komisionit zgjedhor për zgjedhjen e kryetarit të Kuvendit, me votim të fshehtë, që ta bëjnë këtë, por serish nuk pati propozime.
Më pas përbërja e komisionit, me anëtarët e propozuar në vazhdimet e kaluara të seancës, u hodh në votim.
Kryesuesi i seancës konstituive konstatoi se 51 deputetë kanë votuar për, një ishte kundër, ndërsa abstenim nuk kishte asnjë. Për rrjedhojë, Kuvendi do të mblidhet serish brenda 48 orësh, përkatësisht më 23 qershor, në orën 11:00.
Ndërkohë çdo përfundim të vazhdimit të seancës përfaqësuesit e partive politike po hedhin akuza ndaj njëra-tjetrës për bllokim institucional.