Alarm nga vërshimet, FSK-ja në terren

Aktuale

Alarm nga vërshimet, FSK-ja në terren

Më: 6 janar 2026 Në ora: 18:40 Përditësuar në ora: 07:29 më 07.01.2026
FSK në terren

Evakuohet burri me fëmijën që kishin mbetur të ngujuar në veturë nga vërshimet në Obiliq

Një burrë, që kishte mbetur i ngujuar për mbi dy orë në veturën e tij, bashkë me një fëmijë, në Obiliq, tashmë janë evakuuar.

Këtë e konfirmoi Nebih Svirca nga Shoqata e Kërkim Shpëtimit të Kosovës.

Sipas informacioneve të gazetares Altiana Zogaj, ata kishin tejkaluar shiritin që paralajmëronte rrezikshmëri.

Mësohet se vetura është me targa të Shqipërisë.

Vërshimet në Mitrovicë, Peci thërret Shtabin Emergjent

Kryetari i Komunës së Mitrovicës, Faton Peci, ka bërë të ditur se i gjithë mekanizmi shtetëror, në nivel lokal dhe qendror, është në gjendje gatishmërie për intervenim të menjëhershëm për shkak të rrezikut nga vërshimet në rajonin e Mitrovicës.

Peci ka njoftuar se, duke marrë parasysh motin e përkeqësuar nga reshjet e vazhdueshme të shiut dhe rrezikun për vërshime të mundshme, sonte në ora 21:00 ka thirrur mbledhje të jashtëzakonshme me të gjithë akterët kompetentë në zinxhirin e sigurisë dhe intervenimit emergjent.

Sipas tij, në këtë mbledhje është diskutuar për koordinimin ndërmjet institucioneve, vlerësimin e gjendjes aktuale në terren dhe masat që duhet të ndërmerren për menaxhimin e situatës.

“Si kryetar i Komunës, jam i gatshëm që të vë në dispozicion të gjitha mjetet e nevojshme në menaxhim të kësaj situate,” ka shkruar Peci, duke shtuar se në gatishmëri janë edhe ekipet vullnetare për intervenim të menjëhershëm.

Në fshatin Koshtovë në Mitrovicë ka vërshime si pasojë e reshjeve të mëdha të shiut.

Sipas banorëve, janë njoftuar të gjitha ekipet emergjente, ndërsa në zonë kanë dalë edhe vullnetarë për të ndihmuar në përballimin e situatës.

Nga terreni, KosovaPress mëson se të pranishme janë edhe Forca e Sigurisë së Kosovës (FSK), njësitë e zjarrfikësve, si dhe kompania “Toni”, e angazhuar nga komuna për pastrimin dhe hapjen e kanaleve për largimin e ujit.

Ekipi i KosovaPress raporti më parë se edhe lumi Lushta ka dalë nga shtrati dhe është përmbytur stacioni i autobusëve në Mitrovicë si pasojë reshjeve të fundit.

Vërshohet Koshtova, FSK-ja në ndihmë banorëve

Në fshatin Koshtovë në Mitrovicë ka vërshime si pasojë e reshjeve të mëdha të shiut.

Sipas banorëve, janë njoftuar të gjitha ekipet emergjente, ndërsa në zonë kanë dalë edhe vullnetarë për të ndihmuar në përballimin e situatës.

Nga terreni, KosovaPress mëson se të pranishme janë edhe Forca e Sigurisë së Kosovës (FSK), njësitë e zjarrfikësve, si dhe kompania “Toni”, e angazhuar nga komuna për pastrimin dhe hapjen e kanaleve për largimin e ujit.

Ekipi i KosovaPress raporti më parë se edhe lumi Lushta ka dalë nga shtrati dhe është përmbytur stacioni i autobusëve në Mitrovicë si pasojë reshjeve të fundit.

Lehtësohet qarkullimi në rrugën Drenas–Komoran

Kryetari i Komunës së Drenasit, Ramiz Lladrovci, bën të ditur se rruga Drenas–Komoran është lehtësuar për qarkullim, pasi niveli i ujit ka rënë dhe aktualisht është e kalueshme.

Lladrovci ka ftuar qytetarët që të tregojnë kujdes dhe të respektojnë shiritët për ndalim të qarkullimit në disa rrugë dhe pranë urave, duke theksuar se situata kërkon vëmendje të shtuar.

Ai ka falënderuar qytetarët për respektimin e urdhrave të organeve kompetente, si dhe të gjithë kontribuuesit për, siç është shprehur, “lehtësimin e gjendjes” gjatë vërshimeve që i ka cilësuar si të përmasave të mëdha në komunën e Drenasit.

Reshjet e mëdha të shiut kanë shkaktuar vërshime në disa zona të Komunës së Drenasit, duke sjellë rritje të nivelit të ujit dhe vështirësi në qarkullim në disa segmente rrugore. Ekipet komunale dhe shërbimet emergjente kanë qenë të angazhuara për të menaxhuar situatën, ndërsa qytetarët janë ftuar të respektojnë ndalesat e përkohshme të qarkullimit, sidomos në rrugët dhe urat që paraqesin rrezik.

Kryetari i Dragashit apelon qytetarët

Kryetari i Komunës së Dragashit, Bexhet Xheladini, ka apeluar të gjithë qytetarët që të mobilizohen dhe të kenë kujdes të shtuar, me rastin e vërshimeve dhe përmbytjeve.

Duke shpërndarë fotografi nga terreni, Xheladini tha se prurjet në lumenj dhe përroska kanë shënuar rritje të madhe dhe kanë tejkaluar kapacitetet e shtretërve të tyre.

“Ekipet emergjente të Komunës janë në terren, në veprim dhe në vëzhgim të vazhdueshëm të situatës. Gjithashtu, disa kompani private janë vënë në gjendje gatishmërie, megjithatë kapacitetet aktuale nuk janë të mjaftueshme për të përballuar të gjitha nevojat.

Me këtë rast, u bëj thirrje të gjithë qytetarëve që të mobilizohen, sipas mundësive që kanë, me pajisje dhe mjete të nevojshme, për të ndihmuar në sanimin e gjendjes së rrezikut dhe për të minimizuar dëmet” deklaroi Xheladini.

Ky është postimi i plotë i tij:

APEL PËR MOBILIZIM DHE KUJDES TË SHTUAR

Të nderuar qytetarë të Komunës së Dragashit,

Si pasojë e reshjeve të pandërprera dhe të dendura të 24 orëve të fundit, prurjet në lumenj dhe përrocka kanë shënuar rritje të madhe dhe kanë tejkaluar kapacitetet e shtretërve të tyre. Situata paraqitet emergjente në shumë fshatra të Komunës së Dragashit, duke rrezikuar pronën dhe sigurinë e qytetarëve.

Ekipet emergjente të Komunës janë në terren, në veprim dhe në vëzhgim të vazhdueshëm të situatës. Gjithashtu, disa kompani private janë vënë në gjendje gatishmërie, megjithatë kapacitetet aktuale nuk janë të mjaftueshme për të përballuar të gjitha nevojat.

Me këtë rast, u bëj thirrje të gjithë qytetarëve që të mobilizohen, sipas mundësive që kanë, me pajisje dhe mjete të nevojshme, për të ndihmuar në sanimin e gjendjes së rrezikut dhe për të minimizuar dëmet.

Apeloj për kujdes të shtuar, bashkëpunim dhe solidaritet qytetar. Vetëm me angazhim të përbashkët mund ta përballojmë këtë situatë dhe të mbrojmë jetën dhe pronën e qytetarëve tonë.

Ne do të  vazhdojë t’ju mbajë të informuar për çdo zhvillim të mëtejmë.

Malisheva shpall gjendje të jashtëzakonshme

Kryetari i Malishevës Ekrem Kastrati, ka njoftuar se është shpallur gjendje e jashtëzakonshme në këtë komunë pas përmbytjet që ndodhën sot atje.

“Që nga orët e mesnatës, Komuna jonë po përballet me një situatë të rënduar si pasojë e reshjeve të dendura të shiut dhe përmbytjeve që kanë shkaktuar dëme të konsiderueshme në disa zona të territorit tonë. Si Kryetar i komunës, që nga momentet e para jam në terren bashkë me ekipet emergjente të shpëtimit, strukturat komunale, zjarrfikësit dhe Policinë e Kosovës, duke monitoruar nga afër situatën dhe duke koordinuar veprimet për mbrojtjen e jetës së qytetarëve dhe minimizimin e dëmeve”, ka deklaruar ai.

Kastrati theksoi se fatkeqësisht, vërshimet kanë shkaktuar dëme të mëdha në infrastrukturë, rrugë, prona private, toka bujqësore dhe objekte të ndryshme, duke krijuar vështirësi serioze për shumë familje.

“Për këtë situatë të rëndë, shpreh keqardhjen time më të thellë dhe solidaritetin e plotë me të gjithë qytetarët e prekur. Dua të falënderoj të gjitha ekipet emergjente, zjarrfikësit, Policinë e Kosovës dhe vullnetarët, të cilët pa u lodhur, në kushte të vështira dhe me përkushtim të lartë profesional, janë duke punuar pa ndërprerë për menaxhimin e situatës dhe ofrimin e ndihmës aty ku ka nevojë”, theksoi Kastrati.

Kreu i Malishevës, u bëri thirrje qytetarëve që të tregojnë kujdes maksimal, të shmangin zonat e rrezikuara, të respektojnë udhëzimet e institucioneve përgjegjëse dhe të bashkëpunojnë me ekipet në terren.

“Komuna e Malishevës do të vazhdojë të jetë në gatishmëri të plotë derisa situata të stabilizohet dhe më pas do të angazhohemi maksimalisht për vlerësimin e dëmeve dhe përkrahjen e familjeve të prekura”, shtoi kreu i Malishevës.

Situata me vërshimet/ Juniku shpall gjendje të jashtëzakonshme

Situata me vërshimet dhe përmbytjet në vend sa shkon dhe rëndohet.

Komuna e Junikut ka njoftuar se ka shpallur gjendje të jashtëzakonshme.

Në një njoftim zyrtar, Komuna bën me dije se ka formuar shtabin emergjent.

“Në këtë kuadër, fillimi i gjysmëvjetorit të dytë të vitit shkollor 2025/2026 shtyhet deri më 12.01.2026.

I lusim qytetarët për kujdes të shtuar dhe të ndjekin njoftimet zyrtare.

Ditët e humbura të mësimit do të kompensohen” thuhet në njoftim.

Pak më herët, edhe Komuna e Malishevës shpalli gjendje të jashtëzakonshme.

“Që nga orët e mesnatës, Komuna jonë po përballet me një situatë të rënduar si pasojë e reshjeve të dendura të shiut dhe përmbytjeve që kanë shkaktuar dëme të konsiderueshme në disa zona të territorit tonë. Si Kryetar i komunës, që nga momentet e para jam në terren bashkë me ekipet emergjente të shpëtimit, strukturat komunale, zjarrfikësit dhe Policinë e Kosovës, duke monitoruar nga afër situatën dhe duke koordinuar veprimet për mbrojtjen e jetës së qytetarëve dhe minimizimin e dëmeve”, ka deklaruar kryetari i Malishevës, Ekrem Kastrati.

Përmbytjet në vend, reagon presidentja Osmani

Presidentja e Republikës së Kosovës, Vjosa Osmani, ka reaguar pas situatës aktuale në vend, me përmbytjet e shkaktuara nga vërshimet.

Duke shpërndarë fotografi nga terreni, Osmani ka shprehur mirënjohje për të gjitha institucionet që po përballen me këtë situatë.

“Sot gjatë ditës kam qenë në komunikim me kryetarët e komunave të prekura, të cilët po udhëheqin menaxhimin e situatës në terren në koordinim të ngushtë dhe me mbështetjen e institucioneve qendrore.

Agjencia për Menaxhimin e Emergjencave po punon pareshtur bashke me organet e rendit. Falënderoj edhe Forcën e Sigurisë së Kosovës për gatishmërinë e plotë për ofrimin e mbështetjes së menjëhershme, duke vënë në dispozicion kapacitetet e saj njerëzore dhe logjistike, nëse paraqitet nevoja” deklaroi Osmani.

Ky është postimi i plotë i saj:

Mirënjohje e thellë për të gjitha institucionet dhe qytetarët që, përballë reshjeve të dendura dhe vërshimeve të sotme, po reagojnë me përgjegjësi, profesionalizëm dhe solidaritet në mbrojtjen e jetës dhe pronës.

Sot gjatë ditës kam qenë në komunikim me kryetarët e komunave të prekura, të cilët po udhëheqin menaxhimin e situatës në terren në koordinim të ngushtë dhe me mbështetjen e institucioneve qendrore.

Agjencia për Menaxhimin e Emergjencave po punon pareshtur bashke me organet e rendit. Falënderoj edhe Forcën e Sigurisë së Kosovës për gatishmërinë e plotë për ofrimin e mbështetjes së menjëhershme, duke vënë në dispozicion kapacitetet e saj njerëzore dhe logjistike, nëse paraqitet nevoja.

Situata kërkon kujdes maksimal. U bëj thirrje qytetarëve të tregojnë vigjilencë dhe të respektojnë me përpikëri udhëzimet e institucioneve kompetente. Bashkëpunimi i ngushtë dhe reagimi profesional mbeten vendimtare për përballimin me sukses të kësaj situate.

comment Për komente lëvizni më poshtë
Sot mund të lexoni Shfletoni kopertinat