Në seancën e shkurtër të pyetjeve nga Prokuroria për dëshmitarin e saj të parë të mbrojtur, organi ndjekës e pyeti atij lidhur me çështjet procedurale që lidhen me dëshmitarët.
Ai u pyet se sa kohë përpara dëshmitarët shkojnë në Hagë për dëshminë.
Ai u përgjigj 7-10 ditë para ditës së dëshmisë, në mënyrë që gjatë asaj kohe të përgatiten, duke analizuar deklaratat e tyre të para dhe duke shikuar materiale të tjera. Dëshmitari tha se ata kanë të drejtë të ndryshojnë dëshminë e dhënë dhe ta korrigjojnë atë.
Si shembull u mor Rrustem Mustafa i cili nisi dëshminë më 11 korrik 2023. Por, në gjykatore u tregua si dëshmi bileta e udhëtimit për në Hagë që tregonte se ai kishte udhëtuar drejt Holandës më 4 korrik, pra një javë më parë.
Dëshmitari tregoi se ka listë të dëshmitarëve dhe tregohet nëse ata kanë masa mbrojtëse dhe tha se këto gjendet në data-baza të Prokurorisë.
Ai u pyet nëse një dëshmitar, nëse publikisht tregon se do të dëshmojë a i humbet masat mbrojtëse, dëshmitari tha “jo”.
Mbrojtja e Thaçit dhe të katër të akuzuarve të tjerë nuk pranuan që sot të nisnin marrjen në pyetje dëshmitarin. Avokatja e Thaçit kërkoi dy orë për pyetje për dëshmitarin. Gjykatësi vendosi që dëshmia e 07-shit të vazhdojë të hënën.
Mbrojtja e Smakajt: Ai është i pafajshëm, nuk ka folur me Zyrapin për dëshminë në Hagë
Avokati i Smakajt, Jonathan Rees, tha se klienti i tij asnjëherë nuk ka diskutuar me Bislim Zyrapin për dëshminë e tij në Hagë.
“Smakaj, pavarësisht se ka qenë mik me Bislim Zyrapin dhe është takuar me të rregullisht, nuk ka pasur diskutime me Zyrapin lidhur me dëshminë e tij për çështjen 6 [për krime lufte dhe krime kundër njerëzimit] dhe nuk i ka treguar asnjë dokument lidhur me të”, tha Rees.
Sa i përket dokumentit që ZPS thotë se ai gjeti në veturë Smakajt, mbrojtja e tij tha se nuk ka asnjë dëshmi se ky dokument ishte në veturën e Smakajt dhe as kush e solli aty, duke mohuar se ishte marrë nga Smakaj në Hagë.
Ai madje tha se ZPS nuk ka dhënë dëshmi se kush e ka printuar këtë dokument të titulluar “për avokatët” në qendrën e paraburgimit në Hagë.
Prokuroria përfundon deklaratën hapëse, kërkon dënimin e të akuzuarve
ZPS përmbylli deklaratën hapëse, duke argumentuar se provat e saj ndaj pesë të akuzuarve janë “bindëse”.
“Ata kanë kryer vazhdueshëm krimet e përmendura në aktakuzë me vetëdije dhe kërkojmë që ata të dënohen në përputhje me ligjin”, tha ZPS.
ZPS: Të pandehurit synuan pengimin e dëshmitarëve
Nga ZPS-ja thanë se Thaçi udhëhoqi tri grupe të ndryshme, në përpjekjet e tij për të ndikuar te dëshmitarët.
Sipas Prokurorisë, grupi i parë Fazliu, përbëhej nga i akuzuari Fadil Fazliu dhe djali i tij Fahriu. Grupi Smakaj, përbëhej nga ish-shefi i AKI-së, Blerim Shala dhe Artan Behrami. Ndërkaq, në grupin e Kilajt ishte edhe Vllaznim Kryeziu.
“Provat tregojnë se anëtarët e secilit prej grupeve Fazliu, Smakaj, Kilaj, të udhëhequr nga Thaçi, morën pjesë qëllimshëm në një grup përpjekja e të cilit ishte për të penguar dëshmitarët e shënjestruar të çështjes 6 [rasti për krime lufte dhe krime kundër njerëzimit].
Nuk ka asnjë dyshim, të akuzuarit e dinin se çfarë po bënin dhe e dinin se ishte vepër penale”, tha një nga prokurorët e specializuar.
Prokurorët përmendën se për veprat e pengimit të personave zyrtarë, dënimi që parashihet me ligje të Kosovës është 1 deri në 5 vjet burgim.
Për dokumentin që iu sekuestrua Smakajt
Prokuroria e Specializuara tha se sikurse dokumenti që iu gjet Kilajt, edhe Smakajt iu gjet një dokument në makinën e tij, për të cilin pretendoi se ka dhënë udhëzime Thaçi.
Prokuroria lëshoi pjesë të një audio-incizimi që tha se i përket datës 7 tetor 2023, të takimit të Thaçit, Smakajt dhe Artan Behramit.
Aty, tha Prokuroria, Thaçi jep udhëzime se çfarë duhet të flasë Bislim Zyrapi, sikurse sa anëtarë kishte deri më 1998 Shtabi i Përgjithshëm i UÇK-së, se Thaçi kishte qenë në periudha të ndryshme jashtë Kosovës dhe ai të përqendrohej në dëshminë e tij në komandantë të tjerë dhe Adem Demaçit.
Dokument i sekuestruar në makinën e Smakajt, Prokuroria tha se ka të nënvizuar “aspekte që minimizojë rolin udhëheqës të Thaçit në UÇK”.
Ky dokument, sipas Prokurorisë, u printua në Hagë nga Thaçi vetëm pak orë para vizitës së Behramit dhe Smakajt.
Për dokumentin që iu gjet Kilajt
Prokuroria vazhdoi të fliste për dëshminë e dëshmitarit 4, që tha se Thaçi kërkonte që të ndryshohej.
ZPS shfaqi fotografi të një dokumenti të grisur që u gjet në banesën e Kilajt në Kosovë.
Faqja që u bashkua nga ekspertët shfaq, tha Prokurori, faqen 7, pjesën 6 të dëshmisë paraprake të dhënë nga ky dëshmitar.
“Dokumenti i sekuestruar nga Kilaj është pikërisht pjesa dhe faqja që Thaçi tha se dëshmitari duhej ta ndryshonte, që ai kërkoi këtë gjë Kilaj”, tha ZPS.
ZPS pretendoi ky dokument u pritua në qendrën e paraburgimit në Hagë nga Thaçi, dy ditë para vizitës së Kilajt dhe Kryeziut, së bashku me dokumente të tjera që kishin të bënin me dëshmitarin 4 të mbrojtur.
Sipas ZPS-së, kjo tregon se veprat penale u organizuan nga Thaçi.
ZPS: Thaçi dhe Kuçi biseduan për tre dëshmitarë
Më 3 shtator 2023, në Hagë Thaçi dhe Kuçi diskutuan për tre dëshmitarë, pretendoi Prokuroria. Dy nga ta ishin ish-pjesëtarë të UÇK-së, përfshirë Zyrapin dhe i treti ishte një person që do të dëshmonte për keqtrajtimin e pretenduar nga UÇK, tha ZPS.
Thaçi, tha ZPS, udhëzoi se si duhej të dëshmonin.
ZPS tha se ka prova që mbështesin të gjitha pikat e aktakuzës.
“Nuk janë vetëm këto pesë vizita. Ai përdori edhe vizita të tjera për të nxjerrë informacione konfidenciale dhe për të ndërhyrë në dëshmitarë. Motivi: që dëshmitarët të ndryshonin dëshmitë ose të dëshmonin në një mënyrë që ta ndihmonin çështjen e Thaçit”, tha ZPS.
“Thuji, s’i ke parë kurrë”, Prokuroria shfaq në ekran përgjimet e Thaçit
Në gjyqin e dytë që po mbahet ndaj Hashim Thaçit dhe të tjerëve janë shfaqur disa biseda, të cilat sipas Prokurorisë janë zhvilluar gjatë takimeve dhe komunikimeve që ai ka pasur me të bashkëakuzuarit në këtë rast dhe me persona të tjerë.
Këto komunikime, sipas Prokurorisë, janë përgjuar.
Prokurori Joshua Hafetz ka lexuar disa prej tyre në seancë.
“Thjeshtëzoje, thuaji ‘mos e ngatërro, mos e ngatërro o burrë”.
“Thuaji ‘në ’94-’98 këta të dy s’i ke parë kurrë. Mbylle”.
Prokurori thotë se Kilaj u udhëzua se si një viktimë të ndryshonte dëshminë
Gjatë seancës, prokurori tha se në vizitën në Hagë, Kilaj kishte marrë udhëzime se si dëshmitari 4, të ndryshonte dëshminë.
Ky dëshmitar ishte viktimë, “që më parë e kishte implikuar Thaçin lidhur me keqtrajtimin që i kishin bërë anëtarë të UÇK-së”.
Kilaj, tha Prokuroria, mori shënime gjatë takimit në Hagë.
“Thaçi nënvizoi rreshtin dhe faqen e dëshmisë paraprake të dëshmitarit, saktësisht se çfarë duhej të ndryshonte ai”, pretendoi prokurori.
ZPS: Thaçi, përmes Fazliut, e udhëzoi Remin si të dëshmonte
Prokurori Joshua Hafetz pretendoi se akuzat ndaj Fadil Fazliut kanë të bëjnë me udhëzimet që ai mori dhe ia përcolli Rrustem Mustafës- Remit, se si dëshmonte në Hagë gjatë gjykimit të Thaçit.
Fazliu e kishte vizituar Thaçin në paraburgim në Korrik të vitit 2023. Sipas ZPS, me të kuptuar Thaçi se kur do të jepte dëshminë në Hagë Remi, si dëshmitar i ZPS, djali i Fazliut e kontaktoi Remin dhe më pas ai u takua me të akuzuarin.
“Tre ditë më vonë Fazliu shkoi e takoi Thaçin në Hagë dhe vizita u incizua”, tha prokurori.
Pesë ditë pasi ZPS njoftoi për dëshmitarin për 26 qershor, djali i Fazliut kontaktoi Remin që Fadil Fazliu të takohej në Kosovë. Tre ditë më vonë Fazliu shkoi e takoi Thaçin në Hagë dhe vizita u incizua në bazë të një urdhi gjyqësor.
“Gjatë vizitës ai foli për dëshminë e Remit dhe tha se dëshmia e tij ishte vendimtare dhe se ai do të vendoste precedentin e dëshmitarëve pasues që do ta ndiqnin atë, duke thënë atë që Thaçi i tha në hollësi se si do të duhej të ishte dëshmia e Mustafës, çfarë duhej të thoshte ai, në mënyrë që Remi të kthehej në Kosovë 'ose si hero ose si njeri i turpëruar'. Thaçi i dha urdhër Fazliut që këto udhëzime t’ia jepte Mustafës para se ai të dëshmonte në Hagë”, tha prokurori duke shtuar se Fazliu u pajtua dhe madje kontribuoi se çfarë duhej të thoshte Mustafa.
Ndërkaq, Kuçi, tha ai, foli me Thaçin për ndikim ndaj dy dëshmitarëve dhe një viktime.