FSK-ja dhe Policia e Kosovës në stërvitje të përbashkët me forcat amerikane, shqiptare dhe kroate

Aktuale

FSK-ja dhe Policia e Kosovës në stërvitje të përbashkët me forcat amerikane, shqiptare dhe kroate

Nga: Bota sot Më: 17 nëntor 2026 Në ora: 17:01
Pamje nga takimi

Forcat e sigurisë së Kosovës, së bashku me forcat partnere nga Shtetet e Bashkuara të Amerikës, Shqipëria dhe Kroacia, kanë zhvilluar stërvitjen shumëkombëshe “VALOR SHIELD 2026”, e cila është mbajtur në disa lokacione në Kosovë.

Stërvitja ka bashkuar Forcat Operative Speciale të Forcës së Sigurisë së Kosovës dhe Policisë së Kosovës me njësitë partnere ndërkombëtare, me synimin e avancimit të aftësive në fushën e operacioneve speciale dhe forcimit të bashkëpunimit në aspektin e sigurisë.

Përmes një postimi, Ambasada e SHBA-së në Prishtinë ka bërë të ditur se ushtrimi kishte për qëllim edhe rritjen e ndërveprueshmërisë ndërmjet forcave pjesëmarrëse dhe thellimin e bashkëpunimit rajonal.

Në realizimin e këtij aktiviteti, rol të rëndësishëm kanë pasur Ambasada amerikane në Kosovë dhe Grupi i saj Ushtarak (MILGP), të cilët kanë mbështetur bashkëpunimin ndërmjet institucioneve vendore dhe partnerëve ndërkombëtarë.

“Shtetet e Bashkuara mbeten të përkushtuara për të mbështetur institucionet e sigurisë së Kosovës dhe për të ndërtuar partneritete më të forta me aleatët tanë”, thuhet në njoftimin e Ambasadës amerikane.

Sot mund të lexoni Shfletoni kopertinat