Brooklyn Nets afrohet gjithnjë më shumë me vendin e parë

Basketboll

Brooklyn Nets afrohet gjithnjë më shumë me vendin e parë

Më: 12 mars 2021 Në ora: 14:07
Brooklyn Nets afrohet gjithnjë më shumë me vendin e parë

Brooklyn Nets afrohet gjithnjë më shumë me vendin e parë në Konferencën e Lindjes.

Skuadra nju-jorkeze prishi ecurinë positive të Boston Celtics duke triumfuar pa shumë vështirësi përballë 17-herë kampionëve të NBA me rezultatin 121-109. Boston edhe pse vinte nga 4 fitore radhazi në këtë sfidë u dorëzua pa kushte përballë një prej skuadrave pretendente për titullin kampion në këtë sezon të NBA.

Në mungesë të Kevin Durant dhe Blake Griffin diferencën për Nets në këtë sfidë e bëri dyshja Irving-Harden. I pari shkëlqeu me 40 pikë, 8 rebound dhe 3 asiste ndërkohë që Harden shtoi 22 pikë në suksesin e 23-të sezonal të Brooklyn. Për Celtics më i miri mbi parket rezultoi Jason Tatum me 31 pikë.

U rikthye te suksesi Los Angeles Clippers që mori një fitore bindëse përballë Golden State Warriors me rezultatin 130-104, duke zhytur në krizë pikërisht skuadrën nga San Francisco që pësoi humbjen e 4-t rresht. Heroi i kalifornianëve në këtë sfidë ishte i përhershmi Kawhi Leonard me 28 pikë.

Vijon forma e shkëlqyer për Milwaukee Bucks që mori fitoren e 7-të në 8 ndeshjet e fundit pasi kaloi lehtësisht me rezultatin 134-101 New York Knicks. Greku Giannis Antetokounmpo me një triple-double pasi koleksionoi 24 pikë 10 rebound dhe 10 asiste ishte basketbollisti më i mirë mbi parket për Bucks dhe që e udhëhoqi skuadrën nga Wisconsin drejt suksesit të 23-të sezonal në 37 takime që ka zhvilluar në total.

Edhe Miami Heat po kalon një moment të artë. Nënkampionët e edicionit të kaluar, morën fitoren e 8-të në 10 ndeshjet e fundit pasi mposhtën Orlando Magic me rezultatin 111-103. Jimmy Butler me 27 pikë 8 rikuperime poshtë tabelës dhe 11 asiste ishte basketbollisti që spikati më shumë te Heat në këtë sfidë..

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat