Kukësi-Teuta, derbi shqiptar

Futboll

Kukësi-Teuta, derbi shqiptar

Më: 3 tetor 2021 Në ora: 12:32
Kukësi-Teuta, derbi shqiptar

E diela e Abissnet Superiores sjell në fushë dy prej takimeve më interesante të javës së katërt të kampionatit, që i lë vendin më pas skenës së kombëtareve në eliminatoret e Botërorit. Një e diel e zjarrtë, që pas mesdite, me Tiranën dhe Laçin që përplasen në orën 13.45, në një sfidë të karakterizuar historikisht nga rivaliteti dhe, për më tepër, mes dy skuadrave që nuk e kanë nisur kampionatin ashtu siç do të donin, dhe kërkojnë me ngulm rikthimin te fitorja.

Bardheblutë e Orges Shehit, pasi kanë ngecur ndaj Egnatias dhe Kastriotit, dy kundërshtarë për t’u kaluar, synojnë rikthimin te suksesi përballë një Laçi që vetëm në ndeshjen e fundit, atë me Kukësin, demonstroi grintë dhe karakter, duke rikuperuar në shtesë një disavantazh të dyfishtë, falë heroit të këtij sezoni, Zarubica.

Në kampin kryeqytetas, Orges Shehi i ka të gjithë të gatshëm, me përjashtim të Beshirit, dhe kërkon një Tiranë më të orientuar drejt sulmit dhe të përqendruar për të evituar gabimet e zakonshme në mbrojtje.

Te Laçi, Vukicevic mbetet ende në kërkim të fitores së parë në stolin kurbinas dhe e ka të qartë se një pjesë e parë si ajo ndaj Kukësit mund t’i kushtojë shtrenjtë.

Pasdite, ndërkohë, emocionet i ofron Teuta – Kukësi, në 16.45, në “Elbasan Arena”, përballen dy ndër skuadrat më interesante në këtë fillim sezoni. Kampionët në fuqi të Edi Martinit, përballë verilindorëve, që janë shprehur mjaft mirë në ndeshjet e para. Skuadra e Diego Longos luan rrjedhshëm dhe krijon, duke evidentuar emra interesantë sidomos në vijën e sulmit dhe përballë një Teute, që si pikën më të fortë ka mbrojtjen, pa dyshim që është një sfidë që ngjall interes edhe në aspektin taktik sa u përket dy fizionomive të ndryshme të lojës.

Teuta, pas dy barazimeve, kërkon 3-pikëshin për të shkuar me shpirtin e duhur në pauzën e kombëtareve, ndërsa Kukësi synon të evitojë gabimet, që u konstatuan ndaj Laçit, ku shpërdoruan disa raste të pastra, por mbi të gjitha pësuan dy gola, duke shpërdoruar një avantazh të dyfishtë, që i çonte shumë pranë fitores së tretë radhazi.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat