Disa fjalë për vëllimin poetik “Gjerdan lirie” (Prishtinë, 2021) të poetit Qazim Berisha

Kultura

Disa fjalë për vëllimin poetik “Gjerdan lirie” (Prishtinë, 2021) të poetit Qazim Berisha

Nga: Zymer Mehani Më: 16 tetor 2021 Në ora: 09:43
Ballina e librit

Qazim Berisha është poet bashkëkohor që reflekton me komponentët në poezinë e tij (përgjithësisht) e në poezinë atdhetare dhe sociale (në veçanti) me vargje të lira motivesh e tematikash të ndryshme, të ndodhura te ne, në këto kohëra të pakohë.

Poeti Berisha reflekton me poezi motivesh të ndryshme, vargjet e të cilit përmbajnë mjaft figura letrare, si metafora, krahasime, epitete etj., e të rimuara ndonjëherë, elemente këto që lexuesin e bëjnë të mos ndalet së lexuari.

Autori Qazim Berisha përmbledhjen poetike “Gjerdan lirie” e ka konceptuar në pesë cikle: 1. Gjurmë kohe; 2. Kujtime malli; 3. Marset e përflakura; 4. Jehonë malesh dhe 5. Dekada rrebeshesh.

Duke u bazuar në atdhetarizmin shqiptar të bijave dhe bijve të kombit (sidomos të Kosovës), që paraqet bazamentin e lirisë dhe të shtetndërtimit, me sakrifica e përvuajtëri deri në flijim, autori Berisha në poezitë e veta lajtmotiv do ta ketë atdhedashurinë.

Frymëzimin poeti Berisha e gjen nga vetë jeta jonë e bukur, por me vështirësi dhe andralla, po ashtu edhe nga heroizmi i djemve dhe vashave të Kosovës, që i dolën zot atdheut.

Pandaj këtë përmbledhje poetike ai ia kushton me respekt të veçantë vëllait të tij, Rrahimit, i cili iku nga kjo botë, për të mos u harruar kurrë.

Në poezitë e Qazim Berishës, të dendur e hasim motivin e atdhedashurisë, siç e gjejmë edhe motivin social, si te poezitë për Kovidin- 19, pastaj poezitë me elemente sentimentale nga jeta rinore etj.

Karakteristik në këtë vëllim poetik do të jetë sidomos cikli i dytë (Kujtime malli), që përbëhet me poezi kushtuese për të afërm, personalitete kombëtare dhe nga jeta kulturore e tj. (Poezitë: Lutemi për ty, poet (Sefedin Xhafollit); Na ike, poet /Djalit të xhaxhait, Sefedin Xhafolli/, Seç na preku dhembja në zemër /Vëllait, Rrahimit/, Bashkë me vëlla jeni rreze e lirisë /Heronjve Mervete dhe Enver Maksutaj/, Na ike, o mjeshtër i penës /Poetit Bajram Bashota/; Tre breza heroizëm nëpër mote /Vëlla Selimit dhe Sevdatit/; Shpirti i poetit fluturoi në qiell /Poetit Vasil Tabaku/; A vritet poeti /Havzi Nelës/; Na i kthyen në arkivole /Djemve që u kthyen në arkivole nga armata jugosllave/; Ike shumë shpejt, o kolegu im i mirë /Kolegut, Asllan Llumnica/; I ndrituri Lasgush (lirikut të madh shqiptar); Dhembje për vëllanë (vëllait, Rrahimit); Qyteti i poetit hesht /Djalit të xhaxhait, Sefedin Xhafolli/; Ti ishe frymëzuesi ynë / Bacë Adem Demaçit/; Vizioni yt- dritë lirie /Profesor Hazir Shalës/; Një jetë e kam për atdhe e për këtë fe /Vizionarit, tribunit, Mulla Idriz Gjilani/; Na iku njeriu i besës e i fjalës /Mikut Nexhip Gërvalla/; DY VIGANË /Afrim .Zhitisë e Fahri Fazliut/; Afrim Zhitia e Fahri Fazliu.

Edhe poezitë e motivit social janë interesante, siç janë ato për pandeminë dhe virusin korona 19 (cikli i tretë:  poezitë Rri n’shpi; vdekja e të moshuarve; komandanti me armatë të bardhë e ndonjë tjetër.

Pra, reflektimi i poetit Qazim Berisha me këto motive të trajtuara dhe me stil të veçantë, po u sjell lexuesve edhe këtë vëllim, që s’do mend se do të na lërë mbresa gjatë leximit.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat