Komuna e Prishtinës me strategji 10-pikëshe për zgjidhjen e problemit të qenve endacakë

Prishtina

Komuna e Prishtinës me strategji 10-pikëshe për zgjidhjen e problemit të qenve endacakë

Më: 27 qershor 2022 Në ora: 16:25
Foto ilustrim

Komuna e Prishtinës konsideron se zgjidhja e problemit të qenve endacakë mund të bëhet vetëm nëse vullneti i mirë i kryeqytetit do të shoqërohej me një vullnet të tillë edhe nga komunat tjera, përfshirë dhe në veçanti edhe nivelin qendror.

Në një komunikatë për media thuhet se zgjidhja e këtij problemi vazhdon të jetë prioritet për Komunën e Prishtinës dhe se deri më tani është shpenzuar buxhet dhjetëfish më shumë se vitin e kaluar për qentë endacakë.

Në mesin e masave të ndërmarra për zgjidhjen e problemit të qenve endacakë përmendet marrëveshja me operatorë të jashtëm ekonomik për trajtimin e 700 qenve endacakë, e cila tanimë ka përfunduar.

Komuna thotë se janë afër përfundimit të procesit të tenderimit të 7 lloteve (rreth 350 mijë euro) për trajtimin e qenve endacakë.

Po ashtu janë ngritur pikat ushqyese nga 5 në 23 pika, të cilat janë vendosur kryesisht në pikat me koncentrim më të madh të qenve endacakë dhe në rrugët hyrëse në kryeqytet.

Në luftën kundër qenve endacakë, komuna e Prishtinës ka themeluar Task-forcën e brendshme komunale për trajtimin e qenve endacakë, si dhe ka themeluar grupin punues me akterë nga jashtë, siç janë MAPL, MBPZHR, Policia e Kosovës, AUVK, organizata e veterinerëve, shoqëria civile etj.

Komuna thekson se është në proces të tenderimit ndërtimi i qendrës për trajtimin e qenve dhe se janë në fazën e konsultimeve me Agjencinë e Ushqimit dhe Veterinarisë së Kosovës (AUVK) në lidhje me fillimin, që pritet të ndodhë shpejt, e procesit të regjistrimit të qenve me pronarë.

Kuvendi Komunal tanimë ka aprovuar fillimin e procedurave për një qendër tjetër gjithëpërfshirëse rajonale dhe të përhershme për trajtimin e qenve, si atyre endacakë, ashtu edhe atyre me pronarë – Strehimorja e Kafshëve.

Deri më tani askush nuk ka mbledhë informata të sakta mbi numrin e qenve endacakë në Prishtinë e as në Kosovë. Shifra e mjeteve të ndara dhe te planifikuara deri më tani për këtë vit është 753 mijë euro, që është më e madhja ndonjëherë, apo dhjetëfish më e lartë se vitin e kaluar.

Strategjia dhjetë-pikëshe e komunës përfshin identifikimin dhe regjistrimin e qenve me vathë dhe mikropçipa, subvencionimi i vazhdueshëm për kastrim, sterilizim e vaksinim të qenve me pronarë, kontrolli i rreptë i mbarështimit dhe i shitjes së qenve, kontrolli i vazhdueshëm i riprodhimit të qenve endacakë përmes metodës Kap, Sterilizo, Vaksino, Lësho, Qendrat për Trajtim të Përkohshëm (QTP) dhe Qendrat e Shpëtimit, prezantimi i ‘kujdestarëve të lagjes për kafshët endacake’, kontrolli i qasjes në resurse – ushqimi i qenve, fushatë për vetëdijësimin e shoqërisë, parku i qenve me pronarë (për socializim dhe rekreacion) dhe inspektorë komunalë për veterinari. 

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat