Prindërit ndalojnë nxënësit në “Shkollën e Gjelbër”, shkak të ftohtit

Prishtina

Prindërit ndalojnë nxënësit në “Shkollën e Gjelbër”, shkak të ftohtit

Më: 16 janar 2026 Në ora: 22:08
Pamje nga videoja

Radiatorët nuk po ngrohin mjaftueshëm.

Prandaj, nënjë klasë është dashur të vendoset edhe një klimë.

Ky investim u bë nga disa prindër në shkollën “Gjelbër” në Prishtinë, ku mësimin e ndjekin nxënësit nga klasa e gjashtë e deri në të nëntën.

Drejtori i shkollës, thotë se problem qëndron tek dritaret, të cilat duhet të ndërrohen.

“Nxehmje ka, shtëpijaku gjatë 24 orëve e monitoron, është në gjendje të rregullt, por që objekti vetë, konstruksioni i objektit i ka disa të meta që na kanë sjell telashe, përshkak të ftoftit që mbretëroi këto ditë, por që ne po e japim maksimumin. Disa prind me vetë financim kanë sjell klima që t’i krijojmë nxënësve kushte sa më të mira, por problem më i madh është objekti që po krijon telashe të mëdha”, deklaroi drejtori i kësaj shkolle, Besart Ismajli.

Ndërkohë, disa prindër këtë të premte vendosën që të mos i sjellin fëmijët e tyre në shkollë.

Siç thanë prapa kamerave, si shkak i të ftohtit në shkollë, fëmijët janë sëmurë.

Drejtori pranon se ka pasur ankesa nga ana e prindërve, por sipas tij, ato asnjëherë nuk janë bërë në mënyrë zyrtare.

“Ankesa ka nga ana e prindërve, por asgjë me letër, asgjë zyrtare. Kështu që ne në takimet e përditshme që i kemi me prindër e shprehin atë shqetësimin të cilën e kanë, por që nuk ka marr masa. Për veç disa prindërve të cilët me vetë iniciativë nuk i kanë sjell sot fëmijët në shkollë. Nuk është numër i madh, janë diku 10-15 nxënës të cilët nuk kanë ardh sot në procesin mësimor”, tha ai.

Nga Drejtoria e Arsimit në kryeqytet, thonë se në buxhetin e këtij viti është paraparë ndërrimi i dritareve në kësaj shkolle.

“Ngrohja në këtë shkollë është funksionale gjatë gjithë kohës. Problemi qëndron te humbja e ngrohjes për shkak të dritareve të dobëta, të cilat veqse i kemi të planifikuara për nderrim në buxhetin e këtij viti. Kemi derguar zyrtarë të komunës për vleresim, dhe gjendja nuk është ashtu si pretendojnë disa prinder. Me rregullimin e dritareve do të rregullohet ky problem një here e mire”, deklaroi drejtori i Arsimit në Prishtinë, Samir Shahini.

Pos dritareve, drejtori i shkollës “Gjelbër”, thotë se objekti ka problem edhe me konstruksionin si dhe me izolimin, pasi temperature nuk është e njëjtë nga klasa në klasë.

comment Për komente lëvizni më poshtë
Sot mund të lexoni Shfletoni kopertinat