Federata e Futbollit e Kosovës ka shprehur falënderim për përkrahjen e madhe të tifozëve, brenda dhe jashtë vendit për ndeshjen Sllovaki-Kosovë, duke veçuar edhe ata që udhëtuan drejt Sllovakisë.
Për shkak të interesimit të lartë për ndeshjen Kosovë – Turqi, që tejkalon kapacitetin e stadiumit “Fadil Vokrri”, FFK njofton se nuk ka më bileta në dispozicion dhe në bashkëpunim me Komunën e Prishtinës, do të organizojë aktivitete të veçanta në kryeqytet, ku përmes ekraneve do të transmetohet përballja vendimtare.
“Duke qenë se interesi për ndeshjen finale Kosovë – Turqi tejkalon kapacitetin e stadiumit, Federata e Futbollit e Kosovës, në bashkëpunim me Komunën e Prishtinës, do të organizojë aktivitete të veçanta në kryeqytet, ku përmes ekraneve gjigante qytetarët do të kenë mundësinë ta ndjekin këtë përballje historike” – ka bërë të ditur FFK.
Ndërkohë kryetari i Prishtinës, Përparim Rama ka ftuar që të gjithë kryetarët e komunave të organizojnë në sheshet e qyteteve shikim publik për të gjithë qytetarët.
“Prandaj, në frymë bashkëpunimi dhe solidariteti, ftojmë kryetarët e komunave që të organizojnë vendosjen e ekraneve të mëdha,në pajtim me rrethanat e sigurisë publike, në sheshet e qyteteve të tyre, në mënyrë që të gjithë qytetarë të kenë mundësinë të përjetojnë këtë natë historike” – shkroi Rama.
Kosova do të ballafaqohet me Turqinë në stadiumin “Fadil Vokrri”, të martën nga ora 20:45.
