Drejtori i Teatrit Kombëtar, Hervin Çuli, foli në një lidhje me “Skype” lidhur me shfaqjen “Galaksia”, e cila u shpall shfaqja më e mirë.
Lidhur me këtë, Çuli theksoi se “Unë jam i lumtur që “Galaksia” u shpall shfaqja më e mirë. Kemi pasur audiencë të jashtëzakonshme”, ndërsa shtoi se “Jam disi i zhgënjyer nga komuniteti artistik, pasi nuk i ka ndjekur shfaqjet e njëri-tjetrit me interes”.
I pyetur për procesin e votimit, Hervin Çuli sqaroi se teatrot kanë votuar për njëri-tjetrin, duke mos pasur të drejtë të votojnë për veten e tyre.
“Ne përdorim një formulë ndryshe këtë herë, që gjithë teatrot votonin për njëri-tjetrin, duke mos pasur të drejtë të votojnë për veten e tyre. Kishim edhe votimin e publikut. Ne shpallëm votimin e publikut, ku patëm një dyndje shumë të madhe, mbi 3500 mesazhe nga publiku”, tha ai.
Ndërkohë, sa i takon situatës së krijuar nga pandemia e koronavirusit, kreu i Teatrit Kombëtar tha se i është drejtuar me një letër Ministrisë së Kulturës, ku i ka kërkuar që të nisë shfaqjet me 20-30% të audiencës.
“Ne do të vazhdojmë me shfaqjet online, derisa të na hapet drita jeshile. Jemi duke përgatitur dy shfaqje. Unë dhe z.Basha iu kemi dërguar një letër Ministrisë së Kulturës dhe komisionit, që vendos masat dhe hapjen e atelieve të ndryshme, që të kemi mundësinë të operojmë si vendet e tjera, me 20-30%, duke pasur parasysh edhe rregulloren, si do të jepen shfaqjet. Jemi në pritje”, u shpreh Çuli.
