Nga data 31 korrik, kompania ajrore “Wizz Air” nis fluturimet direkte nga aeroporti “Nënë Tereza” drejt dy destinacioneve, Barcelonës dhe Këln-it, ndërsa në bazën e saj, ka shtuar avionin e pestë.
Pas prezantimit të dy destinacioneve të reja, drejtori Komercial i “Wizz Air”, George Michalopoulos, në fjalën e tij bëri të qartë objektivat për vitet e ardhshme.
“Jam i kënaqur të njoftoj stacionimin e një avioni të pestë në Tiranë dhe nisjen e dy rrugëve të reja për në Barcelonë dhe Këln. Në tre, katër vitet e ardhshme ne do ta dyfishojmë flotën tonë të bazës së Tiranës dhe ky zhvillim parashikon lëvizjen e rreth pesë milionë pasagjerëve me ‘Wizz Air’, destinacione të reja nga Tirana dhe standard të lartë shërbimi. Ky është një zhvillim i jashtëzakonshëm për Shqipërinë, për aeroportin dhe për ne”, u shpreh George Michalopoulos.
Ndërkohë, Shefi Ndërkombëtar i Aeroportit “Nënë Tereza”, Constantin von Alvensleben u shpreh se stacionimi i pesë aeroplanëve nga kjo kompani ajrore, tregon besim për aeroportin.
“Fakti që ‘Wizz Air’ stacionon pesë aeroplanë në Tiranë është një shenjë e madhe e besimit për këtë aeroport dhe rezultat i disa viteve bashkëpunimi të suksesshëm. Ky hap ofron një perspektivë të re për Shqipërinë duke e afruar vendin me Evropën. Jam i kënaqur të njoftoj angazhimin tonë për të vazhduar bashkëpunimin me ‘Wizz Air’ për një zhvillim thelbësor që do të mbështesë rimëkëmbjen ekonomike të Shqipërisë pas pandemisë dhe gjithashtu do t’u ofrojë konsumatorëve një gamë të gjerë destinacionesh të përballueshme, me çmime të ulëta”, tha ai.
I pranishëm në këtë takim ishte dhe ministri i Turizmit dhe Mjedisit, Blendi Klosi, i cili u shpreh se tashmë synimi është përmirësimi i shërbimeve.
“Duhet të kemi kujdes që në këtë vit të ruajmë cilësinë e shërbimit dhe standardin për të qenë konkurrues për pesë vitet e ardhshme në treg”, u shpreh z. Klosi.
Linja ajrore ka transportuar më shumë se 2 milionë pasagjerë nga dhe drejt Shqipërisë, që kur ka shkelur në tregun vendas.
