Ndërprerjet e energjisë nga moti i keq, Çela: Në terren 2200 punonjës të OSHEE, vetëm 12 fidera ende me defekt

Shqipëria

Ndërprerjet e energjisë nga moti i keq, Çela: Në terren 2200 punonjës të OSHEE, vetëm 12 fidera ende me defekt

Më: 30 nëntor 2021 Në ora: 15:25
Adrian Çela

Administratori i OSHEE Adrian Çela ka folur në News24 për situatën në vend të krijuar pas motit të keq me reshje shiu e bore që ka përfshirë vendin. Çela tha se aktualisht situata më e rënduar sa i përket energjisë elektrike dhe ndërprerjeve të saj është në Drejtorinë Rajonale të Burrelit. Ai shpjegoi se janë 12 fidera me defekt, për një numër prej 19 218 abonentësh. Sipas tij, ndërprerjet nuk ndodhin në çdo reshje, por kur ka furtunal. 

“Kur kemi reshje të shumta bore dhe kohë të keqe, furtunal. Jemi koshientë që situata në të tilla raste do pasqyrohet dhe me rritje të defekteve. Jo kur ka reshje të shiut normal përveç ditëve të caktuara kur kemi fortunal apo reshje dëbore që impaktojnë linjat e furnizimit të energjisë elektrike sidomos në zonat e thella rurale. Aktualisht kemi në terren 2200 punonjës, në gatishmëri 24 orë. 

Situata ka ardhur drejt përmirësimit. Në momentet që flasim nga 1200 fidera janë vetëm 12 fidera ende me defekt. 19218 abonentë janë pa energji elektrike në këto momente. 322 janë në zonat urbane.
Situata më e agravuar në Drejtorinë Rajonale Burrel, për terrenin e vështirë që ka kjo zonë. Ka reshje bore dhe punonjësit e OSHEE po punojnë në kushte ekstreme të motit për t’iu kthyer energjinë banorëve”
, tha Çela. 

Lidhur me rastin e Dervicianit, ku pas përfshirjes së banesës nga flakët humbi jetën një 12-vjeçare, kreu i OSHEE deklaroi se abuzohet me këtë rast.

“Një rast ekstrem dhe shumë tragjik. Më vjen keq që abuzohet me këtë rast. Kam dëgjuar dhe histori ra ashensori e ka fajin OSHEE. Defektet ne jemi dëshmitarë, jo vetëm në Shqipëri ne pamë si një javë më parë qytete në Europë ngelën në errësirë ekstreme. Ne nuk themi që kemi rrjetin më modern, kemi investuar, por për të investuar në rrjetin elektrik shqiptar duhen 30 vite. Gjatë natës për arsye teknike në shumë defekte është e pamundur ndërhyrja për shkak të rrezikut për punonjësit. Ne kemi pasur dhe raste të humbjes së jetës. Në shumë raste bëjmë dhe stakime për arsye sigurie, ku ka rritje të nivelit të ujit, për të mos pasur dëme më të mëdha kemi raste që i stakojmë, për të ruajtur jetën dhe pajisjet”, tha ai. 

Çela deklaroi se në rast se në 2015-2016 në të tilla situata numri i defekteve ka qenë shumë më i madh, për shkak të ndërhyrjeve në raste emergjencash jemi më të mbrojtur. 

“Në orën 12 të natës kishim 16 fidera në të gjithë vendin pa energji. Në 3 shkoi 40 dhe në 9 të mëngjesit kishim 78 fidera pa energji. Pas dy orësh numri i fiderave zbriti në 38 dhe tani janë 12 fidera me 19218 abonentë. Situata më e rënduar është në Drejtorinë Rajonale Burrel.
Çdo një orë raportohet për përmirësimi ne situatës. në zonat ku ka ngarkesa kemi zhvendosur punonjësit. Në zonën e Dibrës po dërgojmë punonjës të tjerë për të realizuar kthimin e energjisë për banorët pa rënë nata. Ka zona ku vërtetë nuk arrin të hyhet. Ka gjëra që nuk parashikohen. Kërkojmë mirëkuptim që punonjësit e OSHEE si këtë radhë dhe siç kanë demonstruar gjatë gjithë kësaj periudhe do jenë në gatishmëri për të garantuar furnizimin me energji”
, tha ai. 

Çela foli dhe për mungesën e energjisë në zonën e Radhimës më 28 nëntor.

“Ishte një furtunal. Në Radhimë dhe gjithë zonën kemi planifikuar një investim të ri me rrjetin 20 Kilovolt. Ky rrjet aktual nuk mund të përballet me furtunalet. Në Orikum kemi një investim të ri, një rrjet.
Për shkak të situatës së ndërlikuar në tregjet energjetike dhe ne kemi qenë të detyruar të importojmë energji, kemi ndërprerë të gjitha investimet. Për shkak se jemi në këtë situatë nuk kemi arritur akoma ta implementojmë këtë investim. Shpresojmë gjatë 3-mujorit të vitit tjetër”
, tha Çela.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat