Kreu i Partisë Demokratike, Lulzim Basha së bashku me deputetet demokrate Flutura Açka dhe Merita Bakiu, bën homazhe në nderim të ish-prefektit dhe kryetarit të Bashkisë të Tiranës, Qazim Mulleti.
Përmes një mesazhi në rrjetet sociale, Basha shprehu vlerësimin për organizatorët që bënë të mundur që eshtrat e Qazim Mulletit të prehen në vendlindjen e tij.
Me këtë rast, Basha konfirmoi vendosmërinë për të hedhur të gjithë hapat e duhur për të shlyer borxhin moral që shteti dhe shoqëria ka ndaj të përndjekurve politikë dhe për nderimin e sakrificës së tyre në shërbim të lirisë dhe Atdheut.
“E sotmja është një ditë për të nderuar figurën e tij dhe për t’i shprehur mirënjohjen pasardhësve të tij. Shpreh vlerësimin për organizatorët që bënë të mundur që eshtrat e Qazim Mulletit të prehen në vendlindjen e tij.
Bashkë me pendesën dhe ndjesën e thellë të PD për vonesën në nderimin e figurave që i dhanë kaq shumë kombit por u denigruan dhe mbetën në errësirën e propagandës komuniste, konfirmojmë sot vullnetin dhe vendosmërinë tonë për të hedhur të gjithë hapat e duhur për të shlyer borxhin moral që shteti dhe shoqëria ka ndaj të përndjekurve politikë dhe për nderimin e sakrificës së tyre në shërbim të lirisë dhe Atdheut”- shkruan Basha.
Në 67-vjetorin e vdekjes, eshtrat e ish-prefektit të Tiranës Qazim Mulletit kanë mbërritur më në fund në vend, ku do të prehen në Tiranë. Arkëmorti i veshur me flamurin kombëtar mbërriti në Portin e Durrësit, rreth orës 07:00 të mëngjesit të 25 gushtit dhe pas kryerjes së procedurave, eshtrat u nisën drejt Tiranës; ditën e sotme janë kryer homazhet dhe më pas do të bëhet rivarrimi i tyre në vendlindjen e tij.
