Përmbytje masive në Delvinë, zona të tëra të izoluara pas reshjeve të dendura të shiut gjatë natës

Shqipëria

Përmbytje masive në Delvinë, zona të tëra të izoluara pas reshjeve të dendura të shiut gjatë natës

Më: 19 nëntor 2025 Në ora: 09:58
Foto nga vendi i ngjarjes

Reshjet e dendura që kanë goditur Delvinën gjatë natës kanë shkaktuar një situatë të rëndë emergjence, duke bllokuar rrugën kryesore hyrëse të qytetit dhe duke izoluar disa zona.

Prurjet e mëdha të ujit kanë hyrë në biznese përgjatë aksit, duke dëmtuar mallra dhe pajisje, ndërsa banorët raportojnë se niveli i ujit është rritur me shpejtësi.

Punonjësit e bashkisë dhe mjetet e rënda kanë punuar gjatë gjithë natës për të hapur rrugët dhe për të devijuar ujin nga zonat e banuara. Po ashtu edhe kryetari i Bashkisë Delvinë ka qenë në terren, duke monitoruar situatën dhe koordinuar ekipet e emergjencës.

Zona të izoluara:

Vana – Banorët janë aktualisht të izoluar për shkak të prurjeve të mëdha dhe bllokimit të rrugëve lidhëse.

Lagjja Xhermëhallë – Po ashtu e izoluar, me banorë që raportojnë vështirësi të mëdha në lëvizje dhe dëme të konsiderueshme në banesa.

Qendra e qytetit – Biznese të përmbytura dhe qarkullim pothuajse i pamundur në disa segmente.

Autoritetet pritet të japin një përditësim të ri gjatë orëve të paradites, ndërsa banorëve u kërkohet të shmangin lëvizjet e panevojshme dhe të ndjekin udhëzimet e emergjencave civile.

comment Për komente lëvizni më poshtë
Sot mund të lexoni Shfletoni kopertinat