Bllokimi i aksit Librazhd-Prrenjas, Belind Këlliçi: Gurë e baltë aty ku Balluku pozonte për suksese

Shqipëria

Bllokimi i aksit Librazhd-Prrenjas, Belind Këlliçi: Gurë e baltë aty ku Balluku pozonte për suksese

Më: 1 shkurt 2026 Në ora: 17:13
Belind Këlliçi

Deputeti i Partisë Demokratike, Belind Këlliçi, ka reaguar pas shembjes së masivit shkëmbor dhe bllokimit të aksit Librazhd–Prrenjas, duke akuzuar qeverinë për keqmenaxhim dhe korrupsion në infrastrukturë.

Në një postim në Facebook, Këlliçi shkruan se aty ku qindra qytetarë, përfshirë të mitur e të moshuar, u detyruan të prisnin orë të tëra në kushte të vështira, Belinda Balluku dhe Edi Rama kanë mbajtur pozicionet e tyre duke përfituar miliona euro nga projekti i rrugës, ndërsa nuk japin asnjë përgjegjësi për pasojat.

Ai kërkon hetim të plotë për shembjen e rrugës dhe thekson se qytetarët duhet të tregojnë forcën e tyre më 10 shkurt në protestë, për të kërkuar llogaridhënie nga pushteti dhe drejtësi për keqmenaxhimin e infrastrukturës.

Postimi: 

Gurë e baltë aty ku Balluku pozonte për suksese. Duhet zhbllokuar drejtësia që të lirohen rrugët!

Aty ku sot për orë të tëra janë torturuar qindra qytetarë, të mitur e të moshuar, në aksin Librazhd-Prrenjas, kushedi sa herë Belinda Balluku ka pozuar e ka kryer atë pasarelën me regji të gatshme duke u mburrur për punët e mëdha që po bën qeveria, për cilësinë e sigurinë e tyre.

Sot, ajo mungon.

Sot që gurët dhe balta kanë bllokuar qarkullimin dhe kanë vënë në rrezik sigurinë dhe jetën e udhëtarëve, Belinda nuk shfaqet.

Duhet një transparencë e plotë për rastin, por ajo që dihet deri tani është se Belinda Balluku dhe shefi i saj Edi Rama e kanë çuar deri në 20 milionë euro kilomentrin.

Sepse pjesën më të madhe në një km rrugë, e marrin ata vetë.

Ndaj ndodh kjo që ndodh kudo, në gjithë rrugët e vendit. E mbani mend si thoshte Palloshi; rrugët e lënë rrugëve, dhe fajësonte Saliun.

Pse nuk flet sot?!

Del që në mëngjes me një podcast ku dërdëllit pa fund, deliron aty dhe për portretin e tij, e nuk mban asnjë përgjegjësi për pasojat e rënda që sjell keqmenaxhimi dhe korrupsioni në infrastrukturë.

Pas shumë akseve të tjera të shembura, sot edhe Librazhd-Prrenjas kërkon hetim për Ballukun.

Vetëm se Edi Rama nuk e lejon, e mbron, e mban mbi ligjin dhe nuk lejon SPAK të bëjë punën.

Skandali sot është një thirrje më shumë që me 10 shkurt sheshi të oshëtijë e qytetarët t’i tregojnë vendin Palloshit dhe Belindës së tij, e të gjithë atyre që vjedhin e duan të mos hetohen e të mbajnë karrigen me çdo kusht.

Qytetarëve u takon pushteti dhe Bulevardi do ta tregojë këtë me 10 shkurt.

comment Për komente lëvizni më poshtë
Sot mund të lexoni Shfletoni kopertinat