Përlotet zjarrfikësi: Na e kanë humbur moralin e punës e të jetës

Aktuale

Përlotet zjarrfikësi: Na e kanë humbur moralin e punës e të jetës

Më: 4 maj 2021 Në ora: 19:40
Vezir Berisha

Sot është ditë e shënuar e shërbimit të zjarrfikësve, transmeton Gazeta Sinjali.

Vezir Berisha, që ushtron edhe detyrën e shoferit, u shpreh i zhgënjyer me kushtet në të cilat punojnë, duke thënë se janë pak persona në staf dhe se ka shumë punë. Ai deklaroi se shumë shpesh ofendohen nga qytetarët që nuk e dinë realitetin e mundësisë së punës së tyre.

“Kushtet janë të mjerueshme ose të këqija ku punojmë ne. Prapë ne jemi më mirë në krahasim me komunat tjera. Së pari stafi është shumë i vogël, jemi 8 punëtore në këtë bazë që është shumë pak për 3 rajonet që i mbulojmë. Në komuna tjera ndodh që janë nga 2-3 zjarrfikësa, pra shoferi dhe dy zjarrfikësa”.

“Kanë ndodhur raste kur kemi qenë duke intervenuar në një lokacion dhe na kanë telefonuar për të shkuar edhe në një vend tjetër. Na është dashur të vonohemi dhe kur kemi mbërritur aty na kanë sharë e ofenduar, por qytetarët nuk e dinë kush është fajtori, pra që ne kemi mungesë të punëtorëve”.

“Megjithatë me këtë personel që e kemi e japim maksimumin. Në atë moment që bie zijla për të shkuar në intervenim, asnjëri prej nesh nuk e mendon sa e ka rrogën, as sa ka me jetu dhe as ku do të hyjë. Krejt ikin nga zjarri, ne futemi brenda”, deklaroi Berisha.

Ai po ashtu i emocionuar para kamerës së Klan Kosovës deklaroi se kanë shumë vite që presin për paga dhe kushte më të mira, duke thënë se askush nuk merret me ta dhe se e gjuajnë fajin tek njëri-tjetri.

“Jemi bërë si lypsarë. Kushdo që vjen thotë “paga-paga” por askush nuk merret me neve. Tash kur krejt kanë marrë shtesa, neve na hoqën pakon e fundit”.

“Është turp që një zjarrfikës që i ka 40 vjet përvojë pune mos të ketë asnjë rrogë jubilare, as për festa as për orë shtesë e as për ndërrime të natës – me ligj na takon por nuk na japin. Me pagan na kanë barazuar me pastrues e punëtorë sigurimi, e kur kërkohet punë nga ne na quajnë heronj. Mos na jepni fjalë kot. Na e kanë humbur edhe moralin e punës dhe të jetës në këtë aspekt”, përfundoi Berisha, i cili e vuri në pah se vetëm gjatë vitit të kaluar kanë intervenuar në mbi 1 mijë e 300 raste. 

commentFirst article
Sot mund të lexoni Shfletoni kopertinat