Certifikohet grupi i dytë i kursantëve të FSK-së në lëmin e Xhenios Luftarake

Aktuale

Certifikohet grupi i dytë i kursantëve të FSK-së në lëmin e Xhenios Luftarake

Më: 26 shtator 2021 Në ora: 17:03
FSK

Me mbështetjen e instruktorëve të forcave britanike, pas një muaji stërvitje sistematike, është certifikur grupin i dytë i kursantëve të FSK-së, në kursin e Xhenierisë Luftarake sipas konceptit të forcave britanike të Assault Pioneer.

Lajmin e dha Ministri i FSK-së, Armend Mehaj përmes një postimi në Facebook.

“Qëllimi i këtij programi është zhvillimi dhe edukimi profesional në lëminë e Xhenios Luftarake, ku kemi aplikuar tri parimet kryesore të kursit, si: lëvizshmërinë, kundër-lëvizshmërinë dhe mbijetesën”, njofton Mehaj.

Ministri i Mbrojtjes ka shkruar më tej se me mbështetjen e madhe të partnerëve tanë, vazhdon zhvillimi i aftësive dhe kapaciteteve operacionale specialistike të FSK-së, për përmbushjen efektive të misionit dhe detyrave të saj ligjore.

“Populli ynë ka rezistuar dhe luftuar kundër padrejtësive, agresorëve dhe regjimeve shtypëse edhe me mundësi shumë të kufizuara. Kurse, sot kemi ushtrinë profesionale që po e ndërtojmë dhe zhvillojmë bashkë me aleatët tanë, mbi vlerat euroatlantike dhe demokracinë bashkëkohore me synim të plotë për anëtarësim në NATO”, ka kujtuar Mehaj.

Ai ka shtuar tutje se Forca e Sigurisë së Kosovës është ushtri profesionale dhe multietnike e vendosur të mbrojë pavarësinë, sovranitetin shtetëror dhe integritetin territorial, pronën dhe të gjithë qytetarët e saj pa dallim.

“Forca e Sigurisë së Kosovës, si forcë e ndërveprueshme, bashkë me forcat aleate sot, e nesër edhe më shumë, është në shërbim dhe kontribuuese efektive për paqen, sigurinë dhe stabilitetin rajonal dhe global”, ka thënë ndër të tjera Mehaj.

Shfaq komentet
comments powered by Disqus
Sot mund të lexoni Shfletoni kopertinat