Prokuroria e Shtetit nuk është ankuar në shkallën e dytë të gjykatës ndaj aktgjykimit të Gjykatës Themelore në Pejë për dënimin me tetë muaj burgim të personit që dhunoi një 15-vjeçare në Gjakovë.
Prokurorja e rastit, Lirije Morina, është pajtuar me aktgjykimin e gjykatës së shkallës së parë, të nxjerrë të hënën.
Kësisoj, aktgjykimi ndaj të dënuarit, i cili nxiti shumë reagime të hënën, ka marrë formën e prerë. Ndaj tij, nuk është ankuar në shkallën e dytë as pala mbrojtëse.
Bazuar në aktgjykimin e Gjykatës Themelore në Pejë, prokurorja Morina nuk ka kërkuar të merren parasysh asnjë nga rrethanat rënduese.
Organizatat për mbrojtjen e grave kërkuan të hënën që ndaj gjykatëses së rastit, Florije Zatriqi, të zhvillohet procedurë disiplinore dhe në bazë përfundimeve të procesit “t’i jepet masa disiplinore e merituar”.
Për dënimin prej 8 muajsh e 8 ditë burgim ndaj dhunesit të 15-vjeçares, reagoi të hënën edhe ministrja e Drejtësisë, Albulena Haxhiu.
Vendimin e gjykatës ajo e ka quajtur absurd e të padrejtë.